Pakico Politica?
Mi a lanta den un famia humilde na Noord Cura Cabai. Un di e balornan mas importante cu a inculca den mi formacion ta esun di stima mi prohimo y traha duro pa alcansa mi metanan. Mi a scoge pa studia ortopedagogia y terapia familiar a base di mi pasion pa yuda hende. Den mi trabou como profesional, mi a constata sinembargo cu pa yuda hende mester cambio den leynan, proceduranan y instancianan cu ta atende cu mucha, hende muher y otro gruponan vulnerabel den nos comunidad. Mi a realisa cu den politica por logra mehora e situacion pa e gruponan cu mi kier yuda. Asina mi a dicidi di drenta e arena politico na momento cu a haci un apelacion na mi persona.
Pakico vota pa Mervin Wyatt Ras?
“Un voto p’ami, Melvin G. Wyatt-Ras, mihor conoci como Mervin, ta un voto pa honestidad y integridad politico. Un voto pa garantisa cu tin un representante cu ta sali na vanguardia di esnan vulnerable den nos comunidad, manera entre otro mucha, mamanan soltera, nos grandinan y esnan cu limitacion. Na mes momento e ta un voto pa garantisa cu tin un bon cuido medico pa chikito y grandi cu mihor acceso na mediconan y specialistanan, unda remedinan no ta ser cobra na esnan vulnerabel den nos comunidad y unda tin atencion pa prevencion. Un voto p’ami lo garantisa husticia social pa tur y mehoracion di e area social. E ta un voto cu lo garantisa centro di cuido cualitativo y pagabel pa mucha y nos grandinan. Un voto p’ami lo mehora proteccion di nos muchanan contra violencia y tur clase di abuso. Un voto pa preveni criminalidad. Un voto p’ami ta un voto pa garantisa mihor salud mental cu dialogo entre partners riba tereno social y di salubridad. Un voto p’ami lo garantisa cu nos por yama Aruba nos hogar y cu nos por ta orguyoso di nos pais Aruba. Un voto pa Mervin pues ta un voto pa derecho y oportunidad igual pa un y tur.”
Por lesa mas di Mervin su entrevista den nos edicion digital, tanto den Papiamento como na Ingles.
