Pakico Politica?
Mi a nace y crece rond di politica. Mi defunto tata Everaldo Croes tabata hopi envolvi den politica y mi a lanta como mucha hopi serca di nos Libertador Betico Croes. Esaki tabata sigur inspiracionnan positivo cu a motivami pa scoge pa drenta arena politica pa por yuda mi comunidad. Mi deseo ta pa traha pa un futuro mas husto y sostenibel pa Aruba, caminda e bienestar general di tur ciudadano mester prevalece cual ta mi prioridad. Politica ta e plataforma cu ta brindami e oportunidad pa lucha pa cambionan cu ta impacta y cu nos pais merese.
Pakico vota pa Endy Croes?
“Como un politico c’un pasion enorme pa sirbi pueblo y determina pa logra proyectonan grandi y noble na bienestar general di henter comunidad, mi ta comprometi pa representa un voz husto cu respet pa henter Aruba. Mi ta propone pa traha pa diversifica economia, sigui mehora nos enseñansa, halsa nos deporte pa un otro nivel y contruibi riba infrastructura di henter pais Aruba. Nos motto ta pa combati e costo di bida y mehora poder di compra di nos concuidadanonan. Cu e reto di cambio climatico, economia global y tecnologia ta avanzando constantemente y hopi rapido, Aruba ta enfrenta desafionan grandi, pero nos lo vence y surpasa tur obstaculo si nos traha hunto y uza tur nos recursonan poniendo nanishinan den mesun direcion pa yuda cada miembro di nos comunidad. Brindando mi e oportunidad un biaha mas pa sigui traha mi lo percura pa demostra cu hechos e progreso pa nos cada un cual nos tur ta buscando. Mi ta orguyoso di ta forma parti di nos baranca tan stima Aruba Dushi tera!”
Por lesa mas di Endy su entrevista den nos edicion digital, tanto den Papiamento como na Ingles.
