Pakico Politica?
Mi a studia abogacia y fiscaalrecht y a traha varios aña na Departamento di Impuesto. Y despues, prome cu mi a drenta politica, mi tawata traha den un bufete di abogado sin nunca pensa cu un dia lo mi drenta e arena politico. Mientras cu mi tawata gusta mi trabou y a dedica mi tempo completo den eherce mi profesion como abogado, semper tawata biba e deseo den mi curason pa yuda mi pais den un forma mas directo. Mi a lanta den un famia di politico y hopi biaha a puntra mi si mi kier tambe sigui e pasonan di politiconan di famia y semper mi contesta tawata no, te cu a bira dificil pa sigui bisa no. Mi a realisa cu e manera mas efectivo pa ataca desafionan cu Aruba tawata pasa aden y pa yuda trece cambio positivo, tawata pa drenta den e mundo di servicio publico. Mi determinacion y meta como politico, ta pa transforma mi pasion pa soluciona problema y mi compromiso cu husticia social, den accion na bienestar di nos pueblo.
Pakico vota pa Evelyn Wever Croes?
“Ora cu mi a tuma gobernacion pa prome biaha na aña 2017, Aruba tawata den un situacion financiero bastante dificil, c’un deficit cu tawata crece y un falta di transparencia den finansas publico. For di dia cu mi a cuminsa, mi prioridad tawata pa restaura stabilidad y pone nos finansa bek riba e ruta corecto. Durante e crisisnan financiero y social cu mi a hereda, y despues e reto sin precedente di pandemia COVID-19, mi gabinete a traha sin stop pa proteha salud di nos ciudadanonan mientras cu tambe a yuda pa salvaguarda nos economia.
Nos a logra nabega den e tempo disifil, brindando stabilidad y trankilidad. Mi compromiso ta pa sigui construi un Aruba aun mas fuerte y prospero, caminda tur ciudadano ta sinti nan mes sigur y tin oportunidad pa prospera. Si pueblo di Aruba brinda mi un oportunidad nobo, mi lo sigui percura pa transparencia, maneho responsabel y bienestar di tur Arubiano.”
Por lesa mas di Evelyn su entrevista den nos edicion digital, tanto den Papiamento como na Ingles.
