Ki tempo bo interes den crea/ skirbi/ produci a cuminsa?
Di chikito caba mi tabatin un ‘obsesion’ si mi por yam’e asina, cu literatura y tabata busca minimal 8 buki pa siman na biblioteca nacional. Esaki a habri un porta p’ami na un mundo magico caminda mi tabata por a sintimi safe y leu di tur cos cu tabata pasa den mundo real.
Mi ta calcula cu tempo mi tabatin 8/9 aña mi a cuminsa cambia letranan di cancionnan existente. Despues mi a cuminsa les di canto y guitara serca juffrouw Maybeline Arends Croes.
Aki mi a cuminsa pone mi mesun melodia na loke mi tabata skirbi pa no lubidanan. Pero e tabata algo personal cu mi no tabata comparti cu ningun hende. Mi tabata yena schriftnan yen cu mi cancion y pensamentonan. Cu tempo, yiu di juffrouw Maybeline Arends Croes cu yama Giaira Arends, a haya sa di mi schrift y a bay bisa su mama sin cu mi sa, cu mi ta skirbi.
Despues di un les di guitara mi ta corda con juffrouw Maybeline a bin puntrami over di mi schrift. E tempo aki mi no tabata sa cu mi tabata componiendo. Mi a canta mi cancionnan y laga juffrouw Maybeline lesa mi schriftnan y di aki tur cos a cana hopi liher p’ami.
Mi ta kere cu si no ta pa juffrouw Maybeline Arends Croes pa loke ta crea y skirbi y juffrouw Lilian Luidens cu a inspirami pa loke ta produci musicals te ainda mi lo ta cana cu mi schriftnan scondi rond.
Con e reaccion ta te cu awor riba e programanan?
E reaccion ta inmenso. Semanalmente mi sa haya mensahe riba social media of whatsapp depende e topico di e episode.
Tabatin topiconan manera termento cu hasta mayornan a contami con agradecido nan ta cu e programa di Mi Mes Un Heroe, pasobra nan yiu a contanan cu e ta wordo tenta na scol.
Tambe tabatin un maestro di scol cu a contami c’un mucha a mustr’e con golpia e tabata door di su mayornan despues di mira un episodio di Mi Mes Un Heroe.
Y asina tin mas casonan cu ta keda bin, poco poco dilanti.
Esaki ta yena mi cu satisfaccion di por sa cu e programa aki ta funcionando y nos muchanan ta bistiendo nan capanan di heroe y nan ta bin dilanti pa conta nan storianan.
![](https://xclusivomagazine.com/wp-content/uploads/2022/11/RETOCADA-ARTNPHOTOARUBA-44-copy-681x1024.jpg)
Kico ta loke mas nos por spera di Edselyn den 2023?
2023 lo ta un aña caminda mi lo mi traha riba mi crecemento personal y mi lo purba converti mi mes den mi mihor version cu poder di Dios.
Tambe mi lo tin hopi proyecto mas na caminda pa nos mucha y hobennan. No solamente na Aruba pero lo cuminsa purba bay internacional tambe cu mi trabounan.
Por lesa mas di Edselyn su entrevista den nos edicion digital, tanto den Papiamento como na Ingles.