Seis aña pasa ta prome biaha cu Veronique Antens, originalmente di Hulanda, a pone pia riba Aruba pa un vakantie cortico. E flechazo cu Aruba tabata instantaneo. Aruba tabata djis perfecto unda e por a disfruta di e solo y scapa di e friu di Barcelona, e ciudad Spaño unda e tabata bibando. “Mi a encanta di cada momento cu mi a pasa na Aruba. Mi a gusta e isla y mi a pensa cu lo mi bolbe e aña siguiente.” Y ora el a bolbe, e tabata sa cu Aruba lo bira su cas. “Ta masha facil pa mi splica pakico Aruba tabata destina pa mi. E suspiro di trankilidad y seguridad cu Aruba ta ofrece, tabata un cambio radical compara cu e cuidad historico y ocupa di Barcelona unda mi tabata bibando e momento ey. E lama bunita, e clima Caribeanse y e humildad di e Arubianonan, a pone mi simplemente namora di Aruba. Sin embargo den luna di Juli 2022, Veronique ta admiti cu el a siña e importancia di demostra amor no unicamente na e paisahe y hendenan di e isla, sino tambe na e bandera di Aruba; e isla cu awor ta su cas tambe.
ALEGRIA CU HIBA NA UN EROR, SIN MALICIA SU TRAS
Aparte di su preparacion fisico, Veronique ta percura pa semper cu e biaha pa representa Aruba, e tin e bandera di Aruba, bunita paketa den su maleta. Pa su biahe pa e competencia mas grandi di Colombia di Crossfit yama Retofest den Juli 2022 na Pereira-Colombia, esaki no tabata un excepcion. Pa 3 dia el a bataya den e competencia aki cu mas di 500 atleta di 14 diferente pais unda na final, Veronique a sali vencedor den su categoria di Master. “Na e momento cu a keda anuncia cu mi a gana, mi a subi riba e sport podium, manera custumber y c’un emocion y alegria inmenso,” Veronique ta splica. “Mi a pensa prome pa mihor mi pone e bandera di Aruba rond di mi schouder, pero despues mi a cambia di pensamento pasobra mi a pensa cu si mi pone rond di mi schouder, ningun hende lo por mira e bandera di Aruba, cu asina hopi mi ta orguyoso di dje.
Mi ta corda cu e fotografo a yama e otro dos damanan cu a gana na di dos y tres lugar, pa bin para riba e sport podium hunto banda di mi. Cu mi mannan yen cu e premionan ricibi, mi a pone e bandera colga abou na e podium, pero esaki tabata slip. Mi a pensa mi lo pone mi tenchi riba dje pa e no cai. E momento ey, e otro dos damanan tambe a bin aserca y para riba e bandera di Aruba pa saca potret. Na ningun momento mi a pensa of realisa, cu mi tabata para riba e bandera di e isla cu mi ta asina namora di dje y mi a bay representa cu asina hopi gana. Esaki a resulta den un eror, cu a costa mi.”
Unabes cu e potret aki a cuminsa circula na Aruba, e triunfo di Veronique a cambia pa reproche y desaprobacion.
Por lesa mas Veronique su entrevista den nos edicion digital, tanto den Papiamento como na Ingles.
