Tita Peña ta habri su curason pa conta nos con el a sobrepasa perdida di su gran amor, su mama y na mes momento, a haya consuelo bek cu yegada di 2 amor nobo den su bida, su cachonan Coco y Pacheco.
“E fayecimiento di mi mami a cambia mi bida por completo. Un di e momentonan di mas duro di mi bida y di cualkier ser humano ta ora e palabra Cancer ta bati na e porta di bo bida mas ainda, si ta trata di bo mama,” Tita ta bisa. “E ser cu mas mi a stima a keda diagnostica c’un Brain Cancer cu despues a bira un Metastasis den apenas 6 luna. E idea di perde mi mama a cuminsa horta mi paz, mi soño. Un miedo a cuminsa domina, miyon di pregunta sin contesta ta cuminsa bombardea cada minuut di bo dia. Ningun hende ta prepara pa algo asina. Mi mester a dispidi di mami cu apenas 54 aña di edad.”
Conseho
“Sigur den un momento di perdida ultimo cos cu nos por ta considerando ta pa tin un “responsabilidad extra” pero duna un espacio de bo bida pa adopta of tin un mascota. E por ta un terapia impactante pa reduci stress, angustia y ansiedad. E por trece un motivacion extra den un situacion caminda no tin mas ilusion, nan dushi compania y cariño incondicional por minimalisa e dolor den momentonan dificil di bida.”
“No ta por nada tin “assistance animal”. Ta pasobra nan por ofrece sosten emocional na beneficio di un persona hasta cu algun limitacion. Nan ta duna salud pa bo curason, baha bo nivel di Cortisol cu ta e hormona cu stress ta genera. Pa muchanan cu transtorno di atencion of autismo, esaki ta e mihor compania y pa nos grandinan, un pushi por ta un dushi compania den e ‘sunset’ di nan bida.”
Por lesa mas di Tita su entrevista den nos edicion digital, tanto den Papiamento como na Ingles.
