E scenario ta uno perfecto; kizas bo por haya musica suave den fondo, luznan poco baha, un espacio meticulosamente scogi y rondona pa e persona(nan) di mas serca. No ta un cena romantico ta referi na dje kinan sino un parto na cas. Mientras e ta un practica cu ta data di siglonan antes cu a cambia pa partonan na hospital, awendia por mira cu mas y mas muhenan ta cuminsa considera y/of opta pa haya yiu na cas. Na Aruba e grupo aki tambe ta creciendo, asina hopi cu tin un Doula cu ta asisti den e proceso bunita aki. Roxanne ta e creador di Mama of Light, via cual compania e ta bringa e asistencia special aki. Un trabou cu e ta yama su pasion cu a cuminsa, desde cu e tabatin 9 aña.
Doula
“E trabou di un Doula ta un trabou hopi antiguo. E ta un hende muhe cu ta sostene otro hende muhe den e proceso nan di mas esencial/importante di nan bida. Un Holistic Doula ta un hende muhe cu a train profesionalmente pa ofrece guia, sosten y cuido den e aspecto nan mental, emocional, spiritual y educativo durante embarazo, parto y postpartum. Mi amor pa e trabou aki a cuminsa ora mi tabatin 9 aña. Cu 9 aña mi a atende mi prome “parto”, esun di nos cacho na cas. E dia ey mi a keda “mind-blown” di e experiencia di wak un puppy (baby) nace. Esey ta unda mi amor pa biologia tambe a nace y tambe pakico ma dicidi di studia Biologia. Fast forward hopi aña despues bibando y studiando na hulanda mi a haci hopi ceremonia nan spiritual unda cu mi a sinti c’un di mi proposito nan den bida ta pa guia y sostene muhe nan den tur e “rite of passages” cu nan ta experiencia den nan bida di un manera holistico. Despues di esey mi a dicidi pa cuminsa mi journey y haci mi cursonan na Hulanda mes. Tur dia mi ta siña.”
Por lesa mas di Roxanne su entrevista den nos edicion digital, tanto den Papiamento como na Ingles.
