Mitch Almary (36) ta un cantante Arubiano cu a captura e curason di su publico manera ningun otro. E ta ya caba un icono den e escena musical local, cuminsando su carera como cantante den banda ora cu e tabatin apenas 21 aña.
E tempo ey, su voz a keda descubri y su pasion pa musica a keda sendi den un forma unico poniend’e, awe, riba un cantidad di escenarionan tanto na Aruba y afor. Awendia, Mitch ta bibando su mihor bida, soltero y enfoka riba su crecemento personal y profesional. Den e edicion special di Valentine’s Day y Expresion di Amor, nos ta explora su bida, su vision pa e futuro, y kico ta atrae, awor como un soltero, pa yega na e compañero perfecto ey den su bida.
E artista soltero
Ta un artista ta nifica ta bou di mirada publico constantemente, algo cu Mitch ta compronde bon. E ta haci esfuerso pa representa un imagen ehemplar, cuidando su palabranan y accionnan, “casi manera un politico” e ta bisa na harimento. Apesar di su fama y e atencion cu e ta ricibi, e ta mantene un trato respetuoso cu su fanaticonan, y durante su ultimo relashon di nuebe aña, e semper a demonstra respet pa su pareha. Awor e ta soltero, y aunke e no ta buscando, su curason ta habri…pero pa un amor di berdad. Su estado di solteria, leu di ta un limitashon, a bira un espacio pa crecemento personal y apertura emocional.
Por lesa mas di Mitch su entrevista den nos edicion digital, tanto den Papiamento como na Ingles.
