No ta di awor, sino di decadanan caba, e arte di ‘public speaking’ a demostra cu e capacidad di e abilidad aki, por duna poder na palabra pa inspira, informa y comunica den un forma efectivo.
Den historia, e arte y dominio di ‘public speaking’ a crea lidernan grandi di pasado, presente y futuro. Mundialmente desde 1924, ta existi un organisacion yama Toast Masters cu a y ta siña personanan e arte di ‘public speaking’ hunto cu abilidad di liderazgo. Ta calcula cu awendia, tin mas di 280 mil miembro entre 144 pais, dividi den mas di 14 mil clubs.
Aruba tambe tin su Toast Master Club desde 2019 cu ta conta cu 22 miembro activo actualmente. Su presidente actual, Milouska Briezen (42) no a pensa nunca cu e lo ta den e posicion lider aki di e club, pasobra ‘public speaking’ no tabata un arte cu e tabata asina comodo cune. Sin spera, un cos a hiba na un otro y a haci awe cu Milouska ta no djis domina sino inspira como tambe yuda hende na mira e importancia di ‘public speaking; den tur parti di nan bida.
EROR DI PUBLIC SPEAKERNAN LOCAL
“Como un public speaker, bo tin e responsabilidad pa comunica den un forma efectivo cu bo publico. Loke mi ta mira diariamente ta cu hopi public speakers no ta educa nan mes con por presenta efectivamente, cu respet, den un forma dinamico den nos ambiente. Nan ta usa hopi ‘filler words’ y sonido, por ehempel and, well, but, so, you know, ah, um Como un Toastmasters, bo ta pone atencion riba tur e elemento nan aki. Public speaking ta manera un symphonia; bo mester por dirigi esaki den un forma adecua pa e ambiente por disfruta di bo show.”
CON PA PREPARA
“Conoce bo audiencia, familiarisa bo mes cu e hogar (environment), prepara bo discurso, practica y si por, den audiencia familiar. Sea colegial, uza bo lenguahe corporal, bisti apropia, wak den spiel, graba bo mes y kere den bo mes. E reto final mas grandi lo ta pa bo por a logra sea informa, persuadi, entretene, influencia y motiva bo publico.”
Por lesa mas di Milouska su entrevista den nos edicion digital, tanto den Papiamento como na Ingles.
