Pakico Politica?
Mi a lanta den un famia politico. Mi tata tabata lider di Partido PPA. Pa con leu cu mi por corda, semper cas tabata yen di hende y mi tata tabata ocupa cu sirbi comunidad y mi mama no tabata keda tras. E tabata yuda mi tata, muy en particular den campaña electoral y tambe cu tur e amistadnan cu a surgi for di e bida politico aki. Honestamente den prome instante mi
a scohe pa bai studia na Hulanda despues cu mi a caba VWO y eynan despues di a obtene mi bul den pedagogische wetenschappen mi a bin traha den e departamento di Asuntonan Social. Kemen mi a dedica mi mes mas bien na yuda pa cu e problemanan den comunidad. Yuda hobennan, famianan, muchanan den internaat, un cantidad di casonan den e departamento di Asuntonan Social den e seccion di Dificultad di Bida y Famia.
Esey tabata loke mi gusta haci y muy en particular mi tabata enfoca riba e hobennan. Pero despues di dos aña mi a keda aserca pa un lider politico den persona di Nel Oduber y cual a bin cu e pensamento si mi por uni na MEP. Esaki tabata un momento crucial den mi bida paso mi por a opta pa sigui mi mesun carera den e ramo social. Mi tabata pensa di lanta mi propio bureau, lugar di coaching, mi propio praktijk mihor dicho. Y papiando tocante e tema aki cu mi mayornan. E tempo ey m’a dune un pensamento hopi profundo y m’a pensa cu mi por logra hopi mas door di ta un parlamentario paso e ora ey mi por cambia e leynan cu hopi biaha ta un problema y mi por mucho mas miho yega na yuda e hendenan door di bin cu cambionan na nivel nacional. Y eynan a bin e decision pa drenta politica. Cual por cierto for di prome instante mi a haya votonan preferencial e tempo ey, cual a nifica cu m’a drenta Parlamento di Aruba y eynan m’a keda den politica te cu awe, 27 aña despues.
Pakico vota pa Marisol Tromp?
“Mi tin tur experiencia y conocemento necesario den politica pa por enfrenta e retonan cu Aruba tin pa yuda nos pueblo. Votando p’ami bo por tin e confiansa cu mi ta bisabo e cosnan manera cu nan ta y cu mi lo actua e momentonan cu ta necesario na bienestar di e pueblo di Aruba. Ya caba mi a cubri diferente funcion di parlamentario, minister, vice premier, presidente di parlamento, parlamentario independiente, lider di fraccion cualnan tur ta pone cu mi tin bon conocemento di e trabou y proceduranan. Mi a demostra caba por medio di tur e proyectonan cu mi a yega di haci y tambe e trabounan den parlamento di Aruba cu mi ta apto pa dirigi y lidera e pais aki.”
Por lesa mas di Marisol su entrevista den nos edicion digital, tanto den Papiamento como na Ingles.
