Den un sala di corte, e rol di un huez pa ta imparcial, husto y percura pa ley keda sirbi ta sumamente importante. Angèle Martijn (50) ta tuma e rol aki na serio pero e no ta tuma na menos seriedad un otro rol grandi cu e tin desde 13 aña pasa. Un rol cu aparte di ta importante, ta uno yena cu e sentimiento maternal, cu ta e veredicto di amor mas grandi cu e por a haya den su bida, di bira un mama di su yiu homber Adrion.
E BIDA DI UN HUEZ & UN MAMA
Desde september 2021, Angèle ta bek na Aruba. “Si mester compare cu Corsou, claro cu aki mi conoce hopi mas hende loke ta haci cu mi ta menos den anonimidad. Pa loke ta mi trabou mes, esey ta haci cu tin biaha si ta trata di hende cu mi conoce, mi no por haci nan caso. Pa loke ta trata mi bida priva, te ainda mi no a ripara cu e ta mucho diferente cu tempo mi tabatin otro profesion. Claro cu bo mester anda cu mas discrecion y cautela. Principalmente pa loke ta trata expresa bo opinion riba cualkier tema, ya cu por bin un caso over di e tema ey cu consecuencia cu bo ta wordo haya “vooringenomen” pa cual motibo un partido por “wraak” bo”, Angèle ta splica. Pa loke ta e combinacion di su profesion y ta un mama, Angèle ta bisa cu te aworaki e ta combina bon. “E sa pasa si cu despues cu mi tabatin un dia yena cu casonan pisa y cu mi ta mentalmente cansa, cu ainda na cas anochi mi mester yuda mi yiu cu su toets cu e tin e siguiente dia. Y mi ta hacie, pa con cansa cu mi ta. Ta bon mes cu esaki no ta pasa hopi”.
Por lesa mas di Angèle su entrevista den nos edicion digital, tanto den Papiamento como na Ingles.
