E calmo den tur tormenta, esaki ta un forma cu hopi tabata mira Lisette Chung durante su rol como esposa di e politico Otmar Oduber; semper den luz publico pero poco biaha tabata bin dilanti pa expresa su mes. Kizas e unico biaha cu toch e por expresa y pone su creatividad completo den accion tabata durante temporadanan di carnaval unda hunto cu su ex-esposo, e tabata co-lidera e grupo di carnaval TOB, Touch of Brazil. Awor, despues di loke e ta cataloga como un tempo dificil, Lisette a laga e bida rondona pa politica atras pero e accion di carnaval si, ta mas presente cu nunca. 2023 ta habrie como lider absoluto di TOB, conoci como un di e gruponan di mas grandi y luhoso di nos carnaval, algo cu e ta bisa cu realmente, e tabata haci caba su so pa hopi tempo caba. Esaki ta un Lisette renoba y mas creativo cu nunca…
“Ora bo pasa den momentonan dificil, bo bida ta cambia, mester adapta hopi cos, deal cu hopi y diferente emocion pero tambe keda pusha bo mes pa sigui bay dilanti. Mi prioridad awor ta enfoka riba mi crecemento personal, mi famia y mi bida profesional.” Lisette ta admiti cu su bida pa hopi aña, casi 18 aña, den wowo politico como esposa di un politico, tabata consisti di hopi momento di emocion nan mixto. “Dimes cu tin momento cu lo keda graba pa semper pero tambe momentonan hopi fastioso cu mester a deal cu nan como casa di un politico. Tambe como casa di un politico semper bo ta keda den background. Bo no por expresa bo mes paso bo mester tene na cuenta e posicion di bo casa. Awor cu e situacion a cambia, mi por ta mi mes,” e ta bisa.
Awendia e pareha no ta hunto mas, ambos a haya amor nobo den nan bida y ta ‘co-parent’ hunto. Segun Lisette, su aprendisahe di mas grandi di e tempo aki ta balentia. “Bo mester ta balente ora bo pone e spiel bo dilanti y ta fuerte pa enfrenta bo realidad. Como ser humano nos mester tuma momentonan dificil como stepping stones pa nos por sigui p’adilanti. Inverti den bo mes, tuma tempo pa deal cu bo emocionnan pa mayan bo ta mas fuerte cu e dia prome.”
CARNAVAL POST PANDEMIA
Cu yegada di pandemia, hopi cos a cambia pa tur hende riba asina tanto nivel incluyendo carnaval cu a keda cancela pa 2 aña practicamente. Awor bek na 2023, e cambionan t’ey ainda, segun Lisette. “Pa organisa Carnaval, el a bira mas dificil pa haya material pa traha cu ne pasobra tur cos a bira mas caro, menos sponsors cu prome e.o.. Pero danki Dios cu TOB tin su bon nomber y su participante nan fiel cu e aña ‘ki t’ey cu nos un biaha mas.” Lisette ta atribui hopi creatividad como factor principal pa maneha e situacion financiero y toch logra pone su grupo riba pia pa carnava 69. “Como grupo, semper bo ta busca e mihor opcion nan pa loke ta material cu ta keda busca internacionalmente. Mester keda innova. Y ora nos scoge e tema pa e sigiente aña, nos ta tene esaki hopi na cuenta.” E biaha aki, TOB ta opta pa bay cu 2 banda diferente na lugar di 1, pakiko? “Evaluando e prijs di relay vs un di dos banda, e tabata casi mes un cos cu a haci e decision uno facil.
Por lesa mas di Lisette su entrevista den nos edicion digital, tanto den Papiamento como na Ingles.
