Mescos cu carnaval no por sin musica, no tin duda cu esaki tambe ta conta pa e programa di Ivo Yanez. Desde e prome biaha cu el a bay tras di microfon cu apenas 17 aña, e no a stop. E presencia di Ivo Yanez den radio difusion na Aruba a crece c’un velocidad grandi y solido y a evoluciona pa television aserca. Awendia Ivo ta e cara principal den trece noticia via Tele-Aruba tur anochi, ta fungi como maestro di ceremonia pa varios actividadnan, di esun social pa esun politico como tambe su programa radial di dialuna pa diabierna di 2:20 pa 5’or, den cual e ta entretene su fanaticada cu comentario, musica y entrevistanan como tambe yamadanan ‘live’ di su oyentenan. Pero no tin duda, cu e temporada aki di Carnaval ta un di e temporadanan cu Ivo no por haci falta. Su programa, di un forma of otro, ta trece tur tipo di informacion rond di carnaval, informacionnan cu tin biaha ta cambia y bira topiconan di basta controversia. Awor na 2023, cu mas di 150 parada transmiti, mas di 125 reina cu el a corona y fungi como maestro di ceremonia pa mas di 50 actividad di carnaval, Ivo ta cla pa Carnaval number 69. E pregunta ta, lo tin controversia e aña aki na radio serca Ivo for Live?
Kico ta e controversia e aña ‘ki?
Mi no por bisa di awo kico ta e controversia di e aña aki. E controversia nan ta yega segun e temporada ta avansando. Ami no ta crea nan, ta situacionnan cu ta presenta durante un periodo di carnaval y cu no ta existi di awo. Bo bay den historia di nos carnaval lo bo sa cu for di Carnaval 1 tabatin controversia pero e tempo ey, tabata un otro persona na turno pa presenta esaki den su programa.
Hopi solucion y idea nan mi programa a yega trece dilanti. Kiermeen no ta controversia so. Logico, nos tin tendecia di corda y concentra riba e controversia nan pasobra, esey nan hala hopi atencion. Pero mi programa a trece hopi cambio pa bon y conseho nan cu te dia di awe ta traha pa carnaval y/of e competencia di carnaval manera reina y e competencia di musico nan.
Por lesa mas di Ivo su entrevista den nos edicion digital, tanto den Papiamento como na Ingles.
