Desde cu e por corda, su amor pa arte tabata bibo. Di chikito caba por a haya Esmeralda ta haci loke mas e ta gusta; pinta. “E tabata mi manera pa laga tur cos los. Ainda, esaki t’e caso.” Esaki ta un relacion di amor cu Esmeralda ta admiti di a pone na di dos lugar pa hopi tempo, pero awor e ta contento di por a conecta bek cune.
Bo conseho na hobennan cu no tin duda si sigui cu nan pasion di arte como na profesion?
Mi lo conta nan cu e duda eynan a perhudica mi felicidad den hopi sentido. Nada no ta florece si no tin stimashon. P’esey mi a tuma un U-turn, specialmente pa mi a encontra esaki bek den mi bida. Mi por bisa awor cu mi ta un artista feliz.
Kico ta haci un bon artista?
Un bon artista ta transforma su energia den creatividad y asina crea algo bunita cu ta resona cu otronan. Como artista bo mester tin pasenshi cu bo mes durante procesonan den bo trabao, persistencia y lo mas importante e pasion pa arte.
Por lesa mas di Esmeralda su entrevista den nos edicion digital, tanto den Papiamento como na Ingles.
