Den e 21 siman di echo mi a keda confronta c’un noticia cu nunca mi a spera. Durante e cita, cosnan a cana completamente diferente di locual nos a spera. Como mama di dos yui, un echo ta algo familiar, pero esaki a tarda mas di locual mi ta custumbra. E cara di e dokternan tabata indica cu algo no tabata cana manera normal. E dokter inicialmente a splicami kico e ta wak riba e pantaya y despues a yama otro dokter pa bin y confirma. Mi ta corda cu e dokter a bisa mi: “Mi ta sorry señora, pero bo tin mala suerte, bo baby tin Congenital Hernia Diagfragmatica, un condicion cu sa pasa casi nunca”. Hamas mi a yega di scucha di “Congenital Hernia Diafragmatica”, conoci como CHD. Mi otro dos yiunan ta saludabel y mi no por a pensa cu lo tabatin algo cu lo por haci cu e embaraso aki diferente. CHD ta un condicion cu ta pasa den 1 den cada 20.000 baby, caminda e diafragma di e feto no a desaroya completamente y ta keda cu un buraco, e buraco aki ta causa cu e organonan den e abdomen ta subi bay den e pecho di e baby, cu consecuencia limitando e desaroyo di su pulmon.
Un biahe di fe y determinacion
Nos a yega siguiente dia Hulanda na Rotterdam. E siguiente mainta nos mester a bay na Sophia Kinderziekenhuis. Nos tabatin cita cu e gineocologo. Aki e dokter a bisa nos e motibo dicon e la manda yama nos cu urgencia; el a splica cu ami y e baby ta bin na remarke pa e procedura di FETO. FETO ta para pa Fetal Endoscopic Tracheal Occlusion. E ta un procedura cu ainda ta den fase experimental y babynan cu CHD cu ta cay bou di e categoria severo aki ta yega na remarke pa un intervencion asina. E procedura aki ta encera cu ta blokia reversibelmente e trakea di e fetus cu un balon latex den e bariga di e mama.
Por lesa mas di Layhing & Kayden nan entrevista den nos edicion digital, tanto den Papiamento como na Ingles.
