Naci na Colombia pero ta biba na Aruba desde su 8 aña, Danna Garcia (24) ta un cara conoci den nos comunidad. Na 2019 el a logra e titulo di Miss Aruba pero banda di e titulo aki, Danna ta tambe un modelo cu a sa di posiciona su mes c’un ‘poise’ elegante semper. Tur esaki sigur a yude na aumenta su siguidornan riba medianan social c’un presencia solido constante. Banda di tur esaki, su bida profesional ta diferencia cu e mundo glamoroso, trahando como enfermera specialisa na dr. Horacio Oduber Hospital. Un profesion cu ta domina pa su interes semper na e ciologia y e funcion di e curpa humano y su pasion noble di semper di duna cuido na esnan cu mester. Tur esakinan ta ingrediente cu ta haci Danna nos portada principal como nos Social Media Beauty & Brains Queen.
SOCIAL MEDIA
Mi ta un fiel creyente cu si bo planea bo dianan, bo por haci di tur cos, un tiki. Modelahe ta mi otro trabou pero e ta un hobby tambe, e ta yudami calma mi stress y tambe bo ta conoce y traha cu hendenan nobo. Social media ta un plataforma cu ta yudabo den diferente aspectonan. Mi a yega di haya trabou y conoce hendenan via social media. Bo mester sa si kico bo ta post y kico abo ta consumi. Purba di keda mas real posibel y corda cu tur cos riba social media, no ta e berdad. Nos tur ta post e parti bunita di nos bida, nos curpa y relationships.
Mi ta post minimo un biaha pa siman riba feed pero story’s nan si mi ta post tur dia. Mi gusta empower hende muher, mi kier pa nan tur sa nan balor y pa nan sigui traha riba nan mes y stop di pone excusa y djis traha riba locual cu bo kier. E balor agrega p’ami ta cu porta no tur hende ta bay scuchami pero tin biaha mi ta haya mensahenan di mucha muhernan jong cu ta bisami cu nan tambe a cuminsa lesa buki of haci sierto cos y cu mi tabata nan motivacion. Esey p’ami ta amazing. E ta hacimi hopi contento cu mi por aporta algo positivo na sikiera 1 persona.
Por lesa mas di Danna su entrevista den nos edicion digital, tanto den Papiamento como na Ingles.
