Cristina (40) a lanta den un cas cu hopi regla y for di chikito el a realisa cu e ta gusta regla, asina e sa kico pa spera y kico ta wordo spera di dje. Ora a yega e momento pa scoge su estudio, el a scohge basa riba esaki tambe. Na Leiden Hulanda el a haci dos estudio, Bachelor of Law y HBO schuldhulpverlening. Banda di esaki, semper el a sigui desaroya su mes siguiendo varios curso y workshop. Durante su estudio un di e lesnan mas importante cu el a siña ta pa ‘busca bo derecho’, si bo no ta di acuerdo cu algo, duna bo opinion of ‘teken bezwaar’. “Hopi biaha ora nos no ta di acuerdo cu algo nos ta ‘lage para’, pero esey ta costa bo placa y bo paz mental”.
Su periodo como studiante a verloop bon y el a gusta Hulanda, na unda el a traha pa casi 9 aña cu SVB Hulanda. “Eynan mi a siña hopi y mi a crece personal y como profesional”. E tabata pensa ‘con hende por tin problema financiero?’ “Despues mi mes a tuma mal decision y a haya mi den problema financiero.” Esaki tabata un momento hopi duro pa Cristina, pero el a siña un les valioso di bida. “Tur hende por cai abou pero mester lanta di nobo y tuma e lesnan importante pa sigui bay dilanti.” E lesnan cu el a siña ta entre otro pa ta mas asertivo, nunca give up, wak pa bo tin un bon mindset, no keda mira porta sera so, wak con bo por mehora y trece e mihor di bo na mesa.
CONSEHO
Un conseho comun cu semper e ta duna ta: Sali di cas cu un plan semper y pa tur cos. Planea bo dia, kico bo ta bay come y kico bo ta bay gasta. “Sali sin un plan ta pone cu bo bo ta bay haci cosnan spontaneo cu kisas ta bay costa bo placa cu bo no tin pa gasta”. E ta pensa cu mayoria entrepreneur na Aruba ta traha duro pa ‘make it happen’, cu sodor di nan frenta nan ta lanta tur dia y trata na yega sanamente na nan meta, soño y proposito. Di otro banda e ta sumamente importante pa formalisa bo negoshi, traha legal y inverti den cosnan importante manera administracion y customer service. “Esakinan bo no mester mira como gasto, sino como inversion”.
Un bon entrepreneur ta accepta cu e ta humano y no por ta bon den tur cos, sea honesto cu bo mes y traha pa mehora bo mes den e areanan cu bo ta menos bon y inverti den bo mes. Traha riba bo customer service, percura pa bo social media ta up to date y no kibra bo concurencia den bo mesun area, solo ta sali pa tur hende. “Mas importante cu tur cos ta pa bo sigui cu bo soño, si bo ta pensa riba dje tur dia, confia den bo mes y hacie!”
Por lesa mas di Cristina su entrevista den nos edicion digital, tanto den Papiamento como na Ingles.
