Dificil ta sigur pa expone na mundo e aspecto mas vulnerabel di bo bida, di bo pasado, episodionan scur y mahos cu bo a experencia den priva. Aruba ta un isla na unda hopi temanan ainda ta keda taboe y na unda tambe hopi biaha e victimanan no ta wordo encurasha pa bin dilanti y conta nan storia. Kibra e silencio ta sumamente importante asina hopi mas persona por conecta cu e storia di e victima cu ta bin dilanti y purba cambia nan mesun situacion. Esaki ta exactamente locual Audrey Croes a haci. Bibando e dicho “The world has so much to gain from your story”, el a bin dilanti y conta su storia di abuso relacional. E no a keda solamente eynan. Ser un relational violence advocate a bira su proposito den bida awor.
