Anouk Eman, Miss Universe Aruba 2024, ta figura riba nos portada di Xclusivo Magazine c’un mensahe poderoso di forsa, resiliencia y e beyesa cu ta bin di accepta bo mes, manera cu bo ta. Conoci como “Ironwoman” di Aruba pa e 24 schroef di hero den su weso di lomba, Anouk a transforma su bida personal den un plataforma cu ta bay mas leu di loke hende normalmente ta spera di un concurso di reina. “E no ta solamente di beyesa—e ta di uza mi bos pa representa esnan cu no ta sinti nan mes mira,” e ta comparti.
Hunto cune riba e portada, ta aparece Tamarah, Isla y Willow-Mae, tres otro persona di inspiracion, tur cu nan mesun historia di stima bo mes y acepta bo mes ku orguyo. Si nan ta biba cu vitiligo, ta enfrenta bida c’un man menos, of ta uza un rolstoel, esaki ta manda un mensahe claro: e beyesa real ta bini den e curashi pa ta bo mes. Hunto nan ta representa un cambio den manera con nos ta defini beyesa.
Slogan di Anouk pa Miss Universe, “Imperfeccion no tin limite,” ta refleha su creencia cu e beyesa real por wordo encontra den cada detaye unico, cada historia, y cada persona. Esaki ta un mensahe cu no solamente ta encarna riba e stage di reina, pero tambe den su bida di diario. Como un profesionista cu ta traha cu mucha cu necesidad special, Anouk sa di importancia di crea un mundo unda tur hende ta sinti nan mes mira y balora. “Ta un privilegio pa ta nan bos y un privilegio aun mas grandi pa siña di nan forsa.”

Por lesa mas di Anouk su entrevista den nos edicion digital, tanto den Papiamento como na Ingles.