Un cos ta sigur, tanto Terrick Mansur (33)- Software Engineer como Aad-Jan de Gruijl (39) -International Public Management ta gusta tecnologia.
Nan a conoce otro na Hulanda como studiante unda constantemente nan tabata intercambia ideanan riba e ramo aki y con lo por materialisa e ideanan aki pa aporta na Aruba ora nan ta bek. “Tecnologia ta hungando un rol den nos bida diario cu desaroyo positivo pero cu tambe ta bin cu su consecuencianan. Analisando esaki, nos ta ripara cu si nos como comunidad no haci algo, otronan lo dicta nos bida y peor ainda, nos lo keda atras”.
Cu e pensamento aki, e idea pa un Code Club pa Aruba a nace y a cuminsa oficialmente 2 luna pasa dunando lesnan di code na 15 mucha na Aruba. “Cu nos sa, Aruba nunca tabatin un club asina unda muchanan por bay aña aden aña afor pa practica coding cu guia. Nos ta kere cu e lo trece balor, no solamente na e muchanan cu ta atende, pero na nos comunidad tambe.”
TE NA UNDA POR YEGA CU CODING
“Bo por yega con leu cu bo capacidad ta lagabo yega. Mayoria di e companianan grandi di tech manera Google, Apple, Facebook etc, hopi biaha, nan fundadornan ta bin di e mundo di coding of tech in general.
Pakico siña code si awendia di tin hopi programa- of personanan via portalnan internacional ( India) cu ta ofrece nan servicionan na prijs abou?
“Berdad, tin hendenan di India cu ta haci e trabou aki pa un costo hopi barata, pero mayoria di e hendenan aki no ta ekipa pa haci e trabounan mas complica. E hende nan trahando riba e sistemanan mas complica, no ta cobrando $10 dollar pa ora, sino e averahe di $60 – $300 pa ora. Pa proyectonan chikito cu kisas no tin hopi riesgo asocia na dje, e por ta hopi sabi pa uza e developers nan aki. Pero ora bo ta papia di proyectonan mas grandi, manera banking systems, government systems, tax systems, etc, lo no busca engineers den portal nan online.
Otro factor importante ta e cultura y lenguahe. Ta hopi mas facil pa traha c’un hende di bo mesun lenguahe, region y timezone. Recientemente e mercado di Merca ta dunando trabou na hopi software engineers di Latino America pa traha, pasobra nan ta den e mesun timezone y ta mas serca di un Mericano culturalmente, c’un hende di otro banda di mundo lo ta.
FUTURO
“Bo ta wak caba cu hendenan den statistic mester sa con pa code, economistanan mester sa con pa code. Mi ta wak den futuro cu hasta cu abogadonan lo tin cu cuminsa scirbi contractnan legal den code. Ya caba tin hendenan ta experimentando pa wak si ta posibel. Dus mi ta wak den futuro cu coding lo drenta mas y mas den tur profesion.
Por lesa mas di Aad Jan & Terrick nan entrevista den nos edicion digital, tanto den Papiamento como na Ingles.
