Tres aña pasa, Celina Oduber, un Logopedista pasiona y profesional, a logra trece un cambio positivo den e comunidad di Aruba. Cu su añanan di experiencia acumula, el a opta pa keda inverti den su isla y su hendenan cuminsando cu su mesun oficina pa comparti su conocemento cu su comunidad. Un logro cu awe e ta comparti e credito cu Qredits, un partner importante den e logro aki. Realmente e tabata despues di a scucha di Qredits na un manera casual, el a dicidi pa investiga mas di kico tur nan ta ofrece y asina a haya e base solido pa tuma e paso y cuminsa cu su propio praktijk, “Oduber Onderwijs en Logopediepraktijk”. E praktijk aki no ta solamente un negoshi; e ta un mision di Celina pa yuda muchanan y mayornan den nan desaroyo di abilidadnan di comunicacion.
Perfil
“Durante mi estudio mi memoria mas bunita ta mi stage na Shanghai, China. Mi a bolbe Aruba na 2012 unda mi a traha como logopedist na Centro Multidisciplinario, brindando cuido logopedico na 32 scol. E periodo aki a inspira mi pa evalua cua abilidadnan mi lo kier desaroya y a tuma e desafio pa lidera e innovacion di servicionan di Arubalening pa onderwijs na Aruba y exterior. E meta cu esaki tabata pa mira nos team desaroya nan abilidadnan, contribui na oportunidadnan den estudio nobo pa nos studiantenan na Canada, crea un colaboracion entre stakeholders gubernamental y di sector priva, agilisa e proceso di aplica por medio di Arubalening Portal. Esaki ta algun di e proyectonan cu a haci mi periodo na Departamento di Enseñansa uno magico. Na 2021 tabata e intencion pa emigra. Pero a dicidi pa sigui mi curason y kere den e guia cu por brinda muchanan, mayornan y maestronan cu ta experencia desafionan comunicativo. Den e gang na mi cas, Oduber Onderwijs en Logopediepraktijk a wordo crea.”
Por lesa mas di Celina su entrevista den nos edicion digital, tanto den Papiamento como na Ingles.
