Di chikito, Gedis (24) semper tabata fascina cu e eleccionnan di reina di carnaval riba television. “Semper mi tabata sinta dilanti television ta wak mayoria di e eleccionnan di reina, pero como cu mi semper tabata un poco mas yen cu otro mucha muhernan cu tabata participa, mi nunca a imagina mi mes riba escenario. T’e cu algun luna pasa,” Gedis ta cuminsa conta. Aunke e tabata carga cu duda pasobra e no tabata den e standard fisico “tradicional”, su deseo pa participa a crece ora su ekipo a motiv’e pa inscribi y participa.
Inspiracion pa participa
“Loke a inspira- y motiva mi pa tuma e paso aki ta di mira cuanto hende tin cu si ta kere den mi potencial pa por a participa, asina mes como un mucha muhe ‘cu no ta ‘pas’ den e standard di e tipo di mucha muhernan cu nos tin e custumber di mira den eleccionnan di reina na Aruba.”
Durante su caminda pa e corona, Gedis tabatin momentonan di duda, pero el a mantene su enfoke positivo y a ignora criticanan pa logra su meta.
“Mi a hinca desde e cuminsamento cu si mi ta bay participa, mi no ta bay laga mi mente ni opinion di otro cu no lo yudami yega na e meta principal, strobami na logra esaki. Y mi tabata supera esaki door di semper wak e banda positivo di tur situacion cu presenta.”
Por lesa mas di Mitch su entrevista den nos edicion digital, tanto den Papiamento como na Ingles.
