Semper e tabata mi soño pa cuminsa mi propio tienda di paña. Despues di a traha pa Benetton pa algun aña, cual tabata e mihor scol p’ami, cu e impulso di mi esposo, mi a cuminsa un tienda di accesorionan di plata. Esaki a cuminsa den e forma mas spontaneo. Mi ta corda tabata na 1996. Mi tabata viaha pa Benetton pa haci compra pa e tiendanan na Aruba y tabata bay St. Maarten pa haci e merchandising eynan.
Durante un di e viahenan aki, durante un stop na e aeropuerto di Puerto Rico, mi a bay na e mall Las Americas y mi a cumpra un armband cu diseño di Kokopelli pa mi casa, cual a cuminsa haya atencion di hopi hende. Tur hende tabata kier sa di unda e armband aki tabata. Asina mi casa a bisami; “hey, dicon nos no ta cuminsa un tienda cu ta bende plata”?
KICO TA HACI ABO, UN MUHER CU TA INSPIRA?
Semper mi ta comparti mi experiencia cu personanan cu mi por inspira pa nan sigui nan soño. Tin hende cu kizas ta mira bo cu bo negoshi y ta kere cu e caminda pa yega eynan tabata facil. Den mi caso, e no tabata un regalo. Mi mester a traha duro p’e y cuminsa chikito y poco poco, crece pa yega na unda mi kier ta. Mi no tabatin conocemento di joyeria paso ami semper a kere cu lo mi bay den moda di paña. Pero una vez bo ta estableci, bo trabou no ta para. Bo tin cu keda siña, desaroya bo mes, busca cosnan nobo, cambia e product mix, busca marcanan nobo, dus, djis no entrega.
UN MOMENTO INOLVIDABEL DI INSPIRACION
Mayor parti di biaha, algun ex-empleadonan cu ta logra nan soñonan. Sea como empresario of ta sigui crece den otro forma. No tin un caso specifico, sino varios.
INSPIRA NOS MUCHANAN
Siña nan cu nan por haci kico cu nan kier den bida pero e no ta bin di haci nada, nan tin cu traha p’e.
Por lesa mas di Marny su entrevista den nos edicion digital, tanto den Papiamento como na Ingles.
