Desde existencia di Aruba su carnaval, e parti organisatorio tabata semper un reto importante pa su existencia y evolucion. Rond di 1954, e prome comision encarga cu e organisacion di carnaval a haya bida y tabata yama Centrale Carnavalscomissie, CCS. Na 1966, Stichting Arubaanse Carnaval S.A.C. a keda lanta y a keda existi te cu 2014, ora c’un organisacion nobo a keda lanta bou di e nomber Stichting Maneho di Aruba S.M.A.C. Tabata hopi e discusion-, desacuerdo y hasta casonan den corte cu a conclui e rol di S.A.C como dirigentenan di Aruba su Carnaval y a marca asina e cuminsamento di S.M.A.C. den e rol aki. Presidentenan mas conoci sigur ta keda e legendario Milo Croes y Tecla Kelly na mando di S.A.C. mientras cu pa S.M.A.C e prome presidente tabata Randy Thiel, sigui pa Shannon Henriquez y Jason Brown. E funcionnan aki semper tabata uno hopi alaba pero tambe critica den boca di pueblo, sin duda algun. Desde Augustus 2022, Darren Van Ommeren a bira e presidente nobo pa S.M.A.C. cu hunto cu su team, ta na encargo awor cu e organisacion di Carnaval 69 di Aruba. Un rol nobo pa Darren, kende antes tabata para na e otro banda di carnaval como participante y hasta lider di grupo.
CARNAVAL 69 – 70
“Mi a bisa y lo keda bisa; Carnaval lo pasa, cu of sin placa y Carnaval 69 lo bay ta grandi mirando cu aunke tin gruponan cu lo no ta participando, pero sigur nan a realoca nan mes den otro gruponan. Kizas e cantidad di grupo lo ta menos pero e cantidad di participante lo ta mescos. E trabou mes lo ta despues di e carnaval mirando cu loke nos kier haci, lo ta despues. Nos lo kier tin eventonan pa recauda fondo pa SMAC casi tur luna durante aña y di eynan drenta den fuerte den carnaval 70, cu lo bira un carnaval importante.
Y di eynan pa prome di Juli 2024, mi por yama tur hende ayo pa esun cu kier sigui den e funcion aki. Un cos mi por bisa, aworaki, no tin hende para den rij.
CRITICA
Mientras cu e team ta bon y nos ta sigur di kico nos ta haci, nos no tin miedo di critica y nos lo sali defende nos causa. Nos sa cu nos ta haci bon tanto pa e pueblo y e organisacion.
Por lesa mas di Darren su entrevista den nos edicion digital, tanto den Papiamento como na Ingles.
