Si nos mira rond di nos, den cualkier industria y cultura, semper tin 1 tendencia comun cu ta topa cune serca esnan cu ta exitoso den alcansa nan meta; perseverancia. E abilidad di tuma un paso dilanti, hasta si bo ta bo so of contra cualkier forsa, pa alcansa un meta proponi. E abilidad aki no semper ta uno natural, e por ta un abilidad cu bo ta siña y aplica, pero semper e ta un escogencia. Irayka Yanez a haci precisamente un escogencia pa persevera cu su meta ora cu el a cuminsa cu YNZ Montessori High School na 2020, un vision pa amplia un sistema di educacion na Aruba na loke nos tabata conoce. E vision aki y e forma con el a keda ehecuta ta haci Irayka Yanez nos Persona XCLSV 2022, unda su perseverancia y dedicacion pa trece continuacion den un segmento importante pa Aruba cu ta educacion.
IRAYKA;
“Durante mi carera den e sector di educacion den e sector publico, mi a sinti cu Aruba tabata falta variacion den e manera di educa muchanan. No ta tur mucha ta igual y nos no por keda duna educacion pa mucha cu ta promedio. Tin mucha/studiante cu mester mas reto y tin cu mester net un poco menos di e promedio cu ta lage sinti momentonan di exito. Esaki y motibonan mas personal a duna mi e persistencia di cuminsa cu e concepto di Montessori pa muchanan di 12 pa 18 aña. Mi a cuminsa den un periodo di Covid cu tabata dificil pa tur hende cual a dunami toch cierto dudanan si tabata e momeno corecto. Mirando con e yamadanan tabata drenta y cu sosten di mayornan cu ta kere den un otro tipo di educacion, esaki a lagami sinti mas sigur cu e desicion aki tabata uno corecto.
Por lesa mas di Irayka su entrevista den nos edicion digital, tanto den Papiamento como na Ingles.
