Pa prome biaha Aruba a keda representa riba un escenario di beyesa internacional pa un hoben cu down syndrome. Tanique Fatima Chan a haya e honor aki unda for di dia 5 te cu dia 11 di Juli el a subi escenario di Miss Teen Model Universe y a termina e evento cu logro di dos titulo; ‘Mejor traje de Fantasía 2022 y Miss Teen Tropical Universe 2022’. Mas cu e logro di e corona nan aki, e ta representa e mensahe mas bunita cu ta pone atencion riba e importancia di inclusion pa nos hobenan cu down syndrome.
Nos a combersa cu mayornan di Tanique, pa haya sa un poco mas di dje.
Ta pensa cu mas y mas tin e pensamento di Inclusion na Aruba?
Tin cu bisa tin ora si un otro ora no. Nos aki na Aruba mester ta mas receptivo pa cu esaki. Nos mester “See the able not the label”! Nos ta riba e bon caminda, pero mester bin mas instancianan cu por yuda cu esaki. Duna nan e oportunidad di por ta inclui mas den nos comunidad.
Kico ta loke por haci mas na Aruba pa di berdad tin inclusion riba un nivel completo?
Pone nos hende special mas den luz. Inverti den nan ya cu tin potencial cu tin biaha nos mes no ta wak. Ainda tin mayornan c’un sorto di berguensa cu nan tin yui special, esaki no por.
Mester haci mas actividadnan publico unda ta pone e muchanan aki central ya cu actualmente, no tin echt nada ta wordo haci, p’esey cada mayor mester inverti den nan yiunan y no spera pa esaki wordo haci door di otro.
Por lesa mas Tanique su entrevista den nos edicion digital, tanto den Papiamento como na Ingles.
