Recuerdonan mas memorabel di Tristan (23) su infancia ta piscamento cu su tata y ruman den Lagoen na Savaneta, e bario di unda e ta bin, como tambe su dianan ta hunga futbol pa SV La Fama y landamento pa Aruba Dolphins.
Ora cu Tristan a caba VWO na Aruba, e no tabatin un idea kico e kier bay studia. Awe añanan despues, leu e dianan di inseguridad ey a keda. Tristan awor ta para dilanti un etapa importante den su bida, cu ta e continuacion di su formacion academico unda ya caba el a demostra su capacidad magnifico graduando cu varios honor e.o. -Magna Cum Laude- na Universidad Mericano di South Carolina.
Cu djis esaki, Tristan ta un paso mas cerca pa cuminsa cu su estudio pa profundisa su mes den Cancer Research, un pasion cu e ta prepara pa haci un realidad birando asina, e prome Arubiano den e ramo specifico aki.
META
“Mi meta ta pa haci un MD-PhD of PhD den Biomedical Engineering. Awor cu mi a caba mi bachelors, mi ta bay sigui mi masters den Bioengineering na e Universidiad di Pennsylvania, un di e mihor universidadnan den immunologia rond mundo.”
“Aunke mi proyecto den bachelors tabata encera regeneracion di musculo, e lecturanan cu mi a tuma cu Dr. Gower, esta Biomaterials y Immunoengineering, a lagami sera conoci cu mi pasion – usa biomaterial, pa dirigi e sistema imunologico di curpa pa combati cancer. Y esaki ta loke mi kier haci durante mi Masters y despues den mi PhD.
E ta fascinante con un biomaterial por dirigi e mesun curpa humano pa combati diferente enfermedadnan y unda ami kier enfoca riba dje, ta cancer immunotherapies.”
Por lesa mas di Tristan su entrevista den nos edicion digital, tanto den Papiamento como na Ingles.
