Na 1986 un grupo di restaurant a cuminsa forma y enfoca riba mercadeo colectivo y na 1994 nan a keda oficialmente funda como Aruba Gastronomic Association (AGA). Algun aña pasa AGA a cuminsa enfoca riba otro topiconan di interes pa e industria di Food and Beverage y asina a opta pa haci cambio na e associacion. A lanta Aruba Food and Beverage Association (AFBA) cu e meta pa ta mas inclusivo di tur miembro den e industria. Como e voz colectivo y autentico pa e industria y e vision ta pa uni tur negoshi di F&B bou di un solo aliansa, creando un voz confiabel y responsabel pa e industria di F&B. Cu tempo lo mester crea un industria husto y saludabel pa opera aden y eleva e nivel di standard pa Aruba por bira conoci como un isla culinario TOP den Caribe.
DICON UN ASOCIACION?
E beneficionan pa pertenece na un asociacion ta hopi. “Pa cuminsa bo ta forma parti di un comunidad di negoshi cu tin un meta comun,” Carolina ta bisa, “nos ta e unico asociacion di F&B reconoci y tin un comunicacion habri cu gobierno y nos ta traha duro pa wordo scucha.” Otro beneficionan ta pa pertenece na un grupo unda bo por comparti preocupacion y informacion cu otro, participa na seminario, evento, trainings y programanan riba diferente topico. Actualmente e temanan mas urgente ta e tax reform, particularmente e parti di tax on tips, staffing y solucion riba e tereno di educacion y trainings. Ta existi un discrepancia entre locual AFBA ta tende di su miembronan y locual por ehempel departamento di labor ta observa, cu ta un tekort na un banda y hopi hende sin trabou na e otro banda. Pa purba traha un brug, AFBA a organisa un job fair pa esnan cu ta buscando trabou. Esaki ta e comienso di un programa cu lo purba, hunto cu otro partners, prepara y forma trahadornan pa nos industria di F&B pa por sigui ofrece servicio di calidad.
Por lesa mas di Carolina su entrevista den nos edicion digital, tanto den Papiamento como na Ingles.
