E tabata bibando un bida riba un ritmo ‘non stop’. Como bankero bibando na New York pa Nacionan Uni y prome cu e pandemia, Dustin Ling (42) tabata biaha hopi rond mundo. Su orario y cartera di clientenan tabata completo. “Durante e pandemia e situacion a bira hopi mas intenso riba e nivel geopolitico. Sin yiu, mi tabatin hopi mas flexibilidad y menos responsabilidad na cas,” Dustin ta cuminsa conta. Awor sinembargo, hopi cos a cambia cu nacimento di su yiu Spencer Kai. Un cambio cu Dustin ta referi na dje na su decision pa bira tata, cual e no a tuma ligeramente.
SPENCER KAI
E yegada di Spencer Kai tabata uno bunita pero tambe un momento yena cu emocionnan mixto. “Lamentabelmente, nos famia a perde mi tanta stima Yolanda, cu tabata mi madrina y ruman grandi di mi tata. E mesun dia cu nos a dera mi tanta (30 di April 2021), e surrogate mester a bay hospital y Spencer a nace e siguiente dia, prome di Mei pa 2’or di mainta. God works in mysterious ways. Tin biaha tristesa y felicidad ta pasa den e mesun momento. Esey ta loke a pasa cu nos.”
MOMENTONAN SPECIAL
Dustin ta bisa cu e coneccion di Spencer Kai cune y su mayornan ta unico y te fascin’e. Pa loke ta su rutina awor como un tata di un baby di 1 aña; “awor mi ta biaha menos y hopi reunionan ta virtual. Mi bida tin un poco mas balans y flexibilidad den dje. Esaki ta traha mihor c’un baby di un aña. Tambe mi a cambia cliente y awor mi ta bankero pa Banco Mundial y nan tin nan oficina central na Washington D.C., locual ta mas facil tambe p’ami.”
Por lesa mas di Dustin su entrevista den nos edicion digital, tanto den Papiamento como na Ingles.
