Conoci pa hopi tempo caba, prome como un participante y triunfadora den mundo di beyesa, despues como candidato politico y parlamentario, Laïnda Westerhof (40) ta posa pa nos seccion fotografico na Daniels Steak and Chop House, un proyecto completamente renoba pa su compania, Westla General Contractors VBA. E Laïnda aki, no solamente den apariencia, sino tambe den spirito, ta un persona completamente diferente na e Laïnda cu a bandona Politica algun aña pasa…
CONFIA & TRAICIONA DEN POLITICA
Laïnda su interesnan for di chikito tabata amplio, abogacia, patologia pa menciona solamente algun, pero ora el a crece el a bay mas den idioma y literatura. “Prome cu mi a drenta politica mi tabata docente eerste graads di Spaans, un funcion cu mi a eherce cu orguyo”. E hecho di tabata hopi inocente y confia a haci cu durante su bida el a haya hopi golpi den bida, tanto personal como profesional. “Lastimamente mi no tabata por a wak e malicia den hendenan cu tabata rondonami cu a hibami na caidanan y traicion”. Su carera politico pero mas ainda su salida repentino for di politica, a laga hopi pregunta atras. E ta sinti cu circunstancia y sucedidonan despues di su salida di politica mes a duna contesta na hopi di e preguntanan aki. “Mi no a wordo lanta pa ta un Ja Knikker of marioneta di ningun hende. Den mi cas nos tabatin mag di ta mondig, tin nos mesun opinion y para pa locual nos ta kere, pues den e sentido ey, politica no tabata p’ami na e momento ey di mi bida”. Bisa y haci cosnan te hasta ora bo no ta di acuerdo no tabata algo cu e por a haci sin mas. Mirando bek, e no lo cambia nada di locual el a pasa aden, paso tur esaki e ta bisa cu a yude bira un persona hopi mas fuerte, intuitivo, madura y cla pa cualkier reto cu por spere.
“Un dia sigur mi lo bolbe drenta politica. Bo no ta bira un politico, bo ta NACE politico y e profesion ta yamami, pero no awor, mi tin otro proyectonan pa realisa”. Apesar di a sinti cu mes traiciona den comienso, e no ta wanta rencor contra ningun hende, alcontrario, awor e ta sinti su mes libera y alivia. Drumi c’un consenshi limpi ta un regalo cu e ta gradici Dios tur dia p’e. Laïnda ta pensa cu no solamente politiconan sino tambe hopi hende en general na Aruba ta biba cu hopi pretencion di algo cu nan no ta. E no por. “Esakinan ta strobabo di crece y bira e hende cu bo por ta. Mi ta un persona cu tambe no ta keda colga den pasado. E la pasa e la pasa, siña di e foutnan, para bek riba pia sacudi curpa y sigui. Bida no t’ey para pa algo cu a pasa, bida ta sigui y mi tin metanan pa logra y ban sigui pa next chapter di mi bida. Colgando den pasado ta strobabo avansa den bo futuro”. Den su caso esaki a yude crece den su negoshi y pasion nobo cu ta contruccion general.
Por lesa mas di Laïnda su entrevista den nos edicion digital, tanto den Papiamento como na Ingles.
