“Mi salud semper tabata bon”, Jearmen ta cuminsa conta. Di volley pa natacion, cu 18 aña el a cuminsa cu Tang Soo (Arte marcial Koreano cu ta combina elementonan di shotokan karate, subak, taekkyon y kung fu) den cual deporte el a hasta logra su ‘blackbelt’ na 2013. Cu su pasion di ta activo semper, el a sigui cu mountain biking, free diving, paintball y sin falta su gym. Pensa riba un deporte, chens ta cu el a practik’e un momento den su bida of sigur tabata un amante di dje.
“YAMA AMBULANCE”
E unico yiu homber den su cas, e tin 1 ruman muher mas, Jermean tabatin cada paso den su bida futuro planea. Loke e no tabatin nunca den su plan tabata loke a pasa cune e diasabra den luna di october di 2014.
“ Mi ta corda mi a bay sali un rato y ora di bay bek cas, mi a cuminsa sinti mi mes hopi cansa cu sodamento frieuw y un preshon repentino den pecho. Mi a yega cas drumi riba cama pa descansa. Eynan ta e momento cu mi a cuminsa sinti mas dolor te cu mi a bisa mi ruman p’e yama ambulance y nos mayornan. Algo no tabata bon cumi”. Na su yegada na hospital, mesora a pone Jermaen riba un AED machine (automated external defibrillator cu ta duna shock na e curason via e pecho pa regula batimento di curason iregular), unda e dokter cu verpleegsternan a cuminsa traha cune.
“Mi a ripara cu e plakkertjes tabata pega riba mi caba y e ultimo cinco secondenan cu mi ta corda tabata e shock cu mi a haya. Oranan despues mi a lanta na hospital c’un otro dokter controlando mi ‘heart beat’. Den un momento pa otro, Jermean cu 25 aña, a keda exponi na un rutina di bida completamente diferente cu nunca el a spera riba dje. Di un persona hoben y fit pa drumi riba un cama di hospital hayando atencion urgente pa su curason cu no tabata funcionano bon. “Mi mester a haci un catheterisatie (Ta pasa un tubo via adernan pa examina kico por ta e problema di e curason) p’asina por a haya un plan con pa sigui tratami. Loke a sali di esaki tabata cu mi a haya un arrhythmia (batimento di curason mucho liher/poco) y tabatin mester di un pacemaker (machine poni bou di bo piel pa controla batimento iregular di curason via shocknan electrico hopi abou) cual a keda poni via un operacion e siguente siman mes.
“Despues di tres dia mi tabata haya shocknan chikito cu a dura henter anochi, e dia siguente mi a bai hospital pa haci un checkup y nan a controlami pero ningun cambio pa mehoracion a keda detecta. E mesun dia ey cu mi a yega cas, mi a cuminsa dolor na mi curason atrobe”. Jermean mester a bolbe keda interna unda despues di tres dia cu dolor intenso, dokternan a bin saca afor c’un waya di e pacemaker a perfora su curason. Mester a opera urgente pa resolve esaki. Pa 5 luna el a keda den hospital na Aruba, debil sin forsa y sin por a move te na e punto cu e mester a siña cana bek.
UN CURASON NOBO
Jermean a logra bay Hulanda na Erasmus Mc na Rotterdam pa busca un di dos opinion unda cu e contesta mas logico pa docternan tabata cu e tabatin mester di un transplante di curason mesora. “E noticia ki a dunami speransa pasobra e momento ey mi no por a ni cana un distancia chikito sin sinti mi mes hopi cansa”, e ta conta. “Dokternan a cuminsa dunami un lista di scans y test cu mi mester a haci pa cuminsa coordina e pasonan pa ponemi riba e lista pa un curason nobo. Sinembargo, tres siman despues, dokternan a bin c’un plan cu nan por purba drecha mi curason y saca vocht cu sanger bieuw cu tabatin mi curason bou preshon”. Tambe a pone un ICD (un mashin pa pacientnan di riesgo halto cu ta opera cu bateria poni den bo pecho cu waynan pega na e curason cu ta controla e ‘heartbeat’ y por ta crucial den salba e persona su bida si constata un paro cardiaco unda mesora e mashin ta manda un shock electrico pa activa e curason bek). E momentonan cu el a pasa aden a siñ’e masha hopi mes unda na tur momento durante e proceso aki su famia, amigo nan cu a pone fe y forsa den dje tabata un sosten grando pe sigui lucha pa su salud. “Mi a concentra na bira mihor y mi tabata sa cu esaki tabata e pasonan cu mester keda tuma. Mi a haci mi oracion y make my count down te ora mi a bay ‘knocked out’.
KICO A PASA
Te awe dokertnan no por splica kico a pasa cu Jermean su curason, ta sospecha cu por tabata trata di un virus cu por a afecta esaki. Despues di su operacion, e por a sinta caba con un energia nobo a cuminsa ‘built up’ den su curpa. “Dos dia despues cu mi a lanta for di cama, mi a sinti un cambio masha grandi den mi condicion. Por bisa cu mi curason ta funcionando awor di un 30%-40% pa un 70 pa 80%. Mi bida a cambia mas tanto den mi uiterlijk como cu mi a baha basta peso door di e test nan y mi energia no t’ey manera antes cu mi tabata haci tur mi deportenan. Mi tin un low sodium diet y vochtpeberkt”.
Prome cu tur e cos aki a pasa, Jermean tabatin tur su asuntonan regla pa bay Hulanda pa studia IT administrator na Enschede. Awor e ta na Hulanda bek, pero pa chequeonan medico nobo pa mira si toch e tin cu pone su mes riba e lista pa haya un curason nobo, pero e ta bisa di nos ta laga esaki cambia su metanan poni den su bida.
“Mi plan ta pa mi sigi studia. Mi a bin Hulanda pa mi ‘get better’ y mi lo sigi bringa pa mi salud. E no ta facil, pero mi lo logra un dia…”
