Di e alegria di wak bo yiunan hunga y crece mientras na mesun momento haya un balans entre bo rol di mama y bo profesion, semper tin su retonan. Si agrega e hecho di ta un mama soltera na dado momento y tin periodismo como bo profesion sin un ora fiho di trabou paralelo na e responsabilidad di informa un comunidad, ta agrega mas ainda na e rol como mama. Sharina Henriquez (47) sa kico e descripcion aki ta, paso e ta esun di dje y su yiu.
CRITICO & DIRECTO?
“Mi yiu conocemi como un mama hopi directo y critico, aunke como mama mi no ta consistente. Mi ta bisa mi yiu algo fuerte anto 5 minuut despues mi ta purba di suavis’e y hasta compensa (bo kier un icecream hahaha). Mi no sa si mi ta hopi directo y critico. Pa Aruba por ta pero compara cu Merca, mi ta duda. Mi ta honesto y purba di saca e berdad.
Si tin algo grandi andando den noticia, mi yiu ta puntra mi pa detayenan. Tin hopi cos mas andando cu mi no ta publica. Pero mi no ta conta mi yiu tur cos. Mi trabou tambe ta encera secrecia, proteccion di fuente. Y cierto storia mi no ta publica pasobra mi no kier algo lo pasa cu mi famia. Mi ta corda tempo mi yiu a bay scol Sanicolas y mi kier a scirbi riba e gangs, muchanan hopi jong cu ta drenta y ken ta e adultonan cu ta recruit nan etc. Mi no a hacie. Mi no tin miedo di presion politico manera hopi hende ta pensa. Mi tin mas miedo di e mundo comercial cu tin suficiente placa pa bringami den corte of algo otro pa haci mi bida of di mi famia hopi fastioso.
Pruebanan, testigonan, fuentenan, tur nan por cumpra. Mi ta realistico kico mi por y no por, esaki no tin nada di haber di busca e berdad. Ni cuanto mi busca of expone, na final den casonan asina, niun hende, ni e lesadonan kier scucha e berdad.
Tin biaha mi yiu ta contami di e reaccionnan cu e ta haya na scol of otro caminda. Por ehempel cu hende tin miedo di mi. M’a cambia mi tono, purbando di mustra menos emocion. Pero mi wowonan cu werkbrauw diki ta keda, haha. Mi yiu a bisa mi cu nan ta spanta hende”.
Por lesa mas di Sharina su entrevista den nos edicion digital, tanto den Papiamento como na Ingles.
