Den su funcion como Chief Marketing Officer di Aruba Tourism Authority, Sanju Luidens (54) a logra e trabou di su soño unda e por a cumpli cu su meta profesional cu semper e tabatin; esta di contribui na impactonan positivo riba multiple nivel global. “Mi ta kere e reto di mantene Aruba su nomber eyfor den e forma mas positivo y deseabel ta mantenemi ocupa den loke mi ta haci diariamente.
Pero banda di su trabou, Sanju su rol como esposa y mama tabata un di e logronan mas grandi den su bida personal. Uno cu a cuminsa 34 aña pasa, ora el a conoce su casa Gerald Luidens pa prome vez. “Ami tabatin 20, e 22. Mi tabata studiando ainda na Merca mientras Gerald mes net a caba di gradua. Realmente, e tabata un di e mihor amigonan di mi ruman homber. Dus, nos tambe a cuminsa como amigo pero cos a cambia hopi liher desde e prome momento cu nos a sali hunto y a namora di otro”.
Kico bo a siña di bo yiunan durante full e periodo aki?
For di mi yiunan mi a siña con pa ta resiliente. Nan a sigui cu nan estudio exitosamente aunke tabata añanan dificil pa nan. Esaki ta hacimi sinti hopi orguyoso di nan.
Con bo a sigui cu bo bida despues y kico ta bo “driving force”?
Mi forsa ta seguramente mi yiunan. Aparte di esaki, e por zona straño, pero Gerald ta hunga un rol hopi grandi tambe den mi forsa pa continua. Esunan cu tabata conoce, sa cu e tabata stima bida mas cu cualkier cos. Mi por imagin’e ta bisami pa haci lo mihor di cada dia, ya cu e no tabatin e oportunidad. Y como cu mi tin e previlegio di ‘hala rosea’, mi lo percura pa cada rosea ta conta y tin su balor.
Con bo ta tene bo casa su memoria bibo den e seno familiar?
Mi ta papia di dje cu mi yiunan, famia y amigonan. Djis pasobra un persona no t’ey fisicamente cu nos mas , no kiermen cu nan no a biba. E ta realmente un Consuelo pa bay bek y corda e bon momentonan.
Por lesa mas di Sanju su entrevista den nos edicion digital, tanto den Papiamento como na Ingles.
