Aloe Vera ta wordo reverencia rond mundo pa siglonan caba. Emperador Alexander the Great a colonisa e isla di Socotra pa su Aloe pa fortifica su tropanan. Christobal Colon a promocion’e pa su cualidadnan curativo y Reinanan Nefertiri y Cleopatra di Egypto tabata conoci pa uz’e pa realsa nan beyesa. E mata a wordo introduci na 1840 na Aruba y pa mas c’un siglo e mata Aloe ta sinonimo di industria na Aruba. For di un mata cu ta crece salvahe den nos naturalesa arido, nos antepasadonan a traha tur sorto di remedi di tera y a haci comercio den exportacion di e mata cu beneficionan curativo aki. Esaki ta wordo considera como e comienso di Aruba su economia. E mata di Aloe riba nos escudo ta un reconocemento di e hecho historico aki.
