Ta wordo bisa cu pa hopi tempo caba Geoffrey Wever tabata un candidato den mira di varios partido, incluyendo un di e partidonan tradicional mas grandi na Aruba. Tabata un sorpresa pa hopi na momento cu Geoffrey, un persona hopi reserva, a habri un pagina di Facebook y hopi liher su tras a anuncia su candidatura riba partido RAIZ.
CON BO TA DESEA PA E VOTADOR WAK BO COMO CANDIDATO Y PAKICO NAN LO MESTER VOTA PA BO?
Mi ta desea pa e votador wak mi manera mi famia y amigonan ta wak mi. Esey ta e conseho principal cu mi a haya, pa mi keda mi mes y no bay purba di presenta mi mes na un forma popular of populista. Mi ta pidi tur hende pa considerami como nan candidato 25 di juni proximo pasobra mi a bay den politica pasobra mi kier trece cambio den e manera cu pais Aruba ta wordo goberna y mi kier trece cambio den e manera con nos parlamento ta funciona.
Mi tin 15 aña di experiencia como abogado y fiscalista trahando pa e sector comercial y 7 aña como docente di ley na Universidad di Aruba. E preparacion academico y practico aki ta mi instrumentonan pa trece cambio. No solamente mi ta identifica e problema, pero tambe mi ta presenta e solucion, pasobra tin solucion, si tin boluntad politico pa soluciona.
