Un noticia cu a keda ricibi man habri riba social media ta e anuncio cu historiador conoci y stima den comunidad di Aruba, Adolf ‘ Dufi Kock’ lo bira un ‘Laureaat’ door di ricibi un Zilveren Anjer for di man di Princes Beatrix na Palacio di Amsterdam. Esaki lo tuma lugar dia 9 di Juni 2022, den un ceremonia cu lo keda transmit live. E honor aki ta yega apenas algun siman despues cu Dufi Kock a keda condecora na Aruba pa gobernador Alonso Boekhoudt como Lid pa Ridder in de Orde van Oranje Nassau 26 di April ultimo.
KEN TA ADOLF ‘DUFI’ KOCK?
Na 2019 nos a haci un entrevista cu Dufi y nos ta comparti un poco di su biografia.
Dufi (85) a lanta den e bario di San Nicolas y ta bin di un famia di nuebe yiu, pero uno a muri despues di parto. A keda cinco ruman homber y tres ruman muhe. “Un paar di aña atras, nos a perde un ruman homber y un ruman muhe”. E famia tabata hopi religioso y hopi streng, specialmente su tata. “Nos tur a bay scol na San Nicolas y asina scol caba, nos tabata bin cas pa haci huiswerk pa despues por bay hunga pafo y tambe yuda cu tur trabou di cas”. E tempo ey nan no tabatin mag di sali y keda laat anochi for di cas. Bebemento y humamento tabata prohibi. Tur ruman mester a yuda otro, sin excepcion y cu hopi respet den cas.
“Pena la bida nos papia un palabra malo”. Dufi a cuminsa Bewaarschool na 6 aña di edad y sigui pa basis school na Don Bosco School. Semper el a gusta studia y tabata den e topnan na scol cu hasta Frère nan a bin papia cu su mayornan pa mand’e Hulanda pa bira Frère of bay studia. “Mi tabatin hopi disciplina na scol y e recuerdonan di mas bunita pa mi tabata cu e Frèrenan tabata aprecia mi masha hopi. Mi tabata haci hopi tarea pa e Frèrenan”.
LANTA NA ARUBA DI ANTES
“Desde prome cu mi a keda lanta y tabata crece, respet, comportacion y disciplina tabata e e regla di mas importante den cas di mi mayornan. Si bo sali bay cualkier caminda, bo mester pidi permiso di bo mayornan y sea sigur cu bo ta na cas prome cu solo baha. Antes, mucha muhenan no tabatin mag di bay traha ningun caminda pasobra nan mester a yuda mama cuida e otro rumannan. E tempo famianan tabatin hopi yiu tambe. Ta ora e influencia a bin di pafo, mucha muhenan a cuminsa bay traha pa yuda e famia un poco mas financieramente. “Awendia den e tempo moderno, hopi cos a cambia, mayornan ta traha y no tin mucho tempo pa dedica of duna atencion na nan yiunan”. Of kizas tin mas actividad disponibel cu ta haci cu e mayornan ta demasiado ocupa y no ta resta tempo pa duna e debido atencion. Falta di hopi comunicacion entre e mayornan y e yiu(nan) cu ta hunga un rol importante con e yiunan ta lanta”.
Apesar di e sugerencia di e frèrenan pa e studia na Hulanda, despues di a termina su educacion basico na Don Bosco School na aña 1950, Dufi a bay Lago Vocational School como un ‘apprentice’ y a gradua na 1954. “Mi a keda ofreci un aña pa sigui studia na Allenown High School na Pennsylvania, Merca, pero mi tata no a permiti pasobra e tempo ey e dicho tabata cu tur hoben cu termina nan educacion escolar, mester a bay traha na Lago pa cria e famia”. Despues di a termina scol di ‘apprentice’, el a bay traha den Oficina di Light Oils y na aña 1964 el a bolbe ricibi un beca pa bay studia Chemical Engineering na University of Dayton, Ohio. Di regreso, el a bira un Training Coordinator y Instructor den su ultimo 20 añanan na Lago. “Mi tabata entrevista y tuma hobennan na Lago, prepara y dunanan les basico. Tambe mi a duna management training y workshops. Mi a bira e miembro di management di mas jong na Lago”. Total el a traha 35 aña na e compania.
RECUERDONAN BUNITA DI FAMIA Y TRABOU
Dufi a lanta di un famia, mi tata Joseph Kock di San Nicolas y mi mama, Justiniana de Kort di Savaneta. “Mi tata y tur yiu homber, menos esun di mas jong, a traha na Lago pa hopi aña”. E recuerdonan bunita p’e tabata e union familiar y tambe, aunke placa tabata scars, pero cu e binimento di Lago, nan por a haya tur loke nan tabata desea, por ehempel cuminda fresco tabata na abundancia for di Lago Commissary y na un prijs hopi barata. “E periodo di trabou cu mas mi a gusta ta mi ultimo 20 aña na Lago dunando entrenamento, mi tabata miembro di American Society for Training and Development (ASTD) y mester a biaha hopi pa tuma curso of seminario na Merca y un bes na Caracas, Venezuela”. Dia 1 di Juni 1960, Dufi a casa cu Maria Paskel, naci na Aruba dia 25 di maart 1938. “Nos no a wordo bendiciona cu yiu, pero tin hopi, e sobrinonan di ambos banda. Na aña 1987, mi a huramenta como Voogd pa Jolina Hoftijzer-Maduro, desde cu su tata, Vero Ethelwondo (Bochi) Maduro a muri”.
PASION PA/ Y COLECCION DI – HISTORIA DI ARUBA Y SU IMPORTANCIA
“Apesar di a publica 7 buki documenta riba historia di Aruba, ningun ta den curriculum di scolnan”
“Semper historia ta fascinante p’ami pa motibo cu mi ta gusta lesa”. For di dia cu el a cuminsa scol di ‘apprentice’ na Lago, e tabata abona na Reader’s Digest, National Geographic, y Popular Mechanics. “Mi tabata miembro honorario di National Geographic”. Ainda na e edad di 85, e ta studia y haci hopi investigacion, specialmente riba historia di Aruba, cu hopi no ta realisa con rico nos isla chikito aki ta den su historia. Primeramente Dufi ta entrevista hopi di nos grandinan durante skirbimento di su bukinan, pasobra cada bes cu un di nos grandinan bay laga nos, un parti di historia tambe ta bay. “Tambe mi ta haci hopi investigacion cu a bira pa mi un recreacion hopi interesante y valioso”. E ta bishita Biblioteca y Archivo Nacional cu frecuencia. “Nos mester tuma na serio cu nos mester laga bon documentacion y corecto pa nos futuro generacion. P’esey mi ta skirbi buki, duna charlanan na scol ki ora cu mi haya peticion of door di mi mesun acercamento. Mi ta sea sigur cu loke mi pone den mi buki, mi tin prueba, sino mi no ta pone. Hopi hende no ta realisa cu nos isla ta chikito den tamaño, pero grandi den historia”. Dufi ta keda hopi solicita pa entrevista y no ta pornada el a skirbi y publica ocho buki di cual siete ta di nos historia. Apesar di esaki e ta hopi desapunta cu ningun di e bukinan a wordo inclui den curriculum di scolnan. “Un recien ta Historia di Canashito cu ta na benta na tur libreria pa Fls.”35.00.
E TA HOPI IMPORTANTE PA DOCUMENTA NOS HISTORIA
E cosnan mas interesante cu e mes a descubri durante investigacion ta informacionnan cu e ta ricibi di e refineria y Di Dos Guera Mundial, esaki door cu e ta miembro di cuatro organisacion di e Mericanonan cu a traha na Lago y a lo largo el a bira e informador pa nan. “Tambe mi tin mi amigo y colega Sr. Jos Rozenburg cu ta traha na Defensie, Den Haag, Hulanda cu hunto cu mi, nos ta haci hopi investigacion. E tin hasta documentacion, manera log book y video cu mi a ricibi di e Di Dos Guera Mundial for di Alemania, via Sr. Rozenburg”.
E ta masha importante pa documenta nos historia si nos kier laga bon documentacion pa nos futuro generacion. Dufi tin mas di 2mil siguidornan riba Facebook. Den su Facebook el a forma su Grupo Seccion Historico cu tin mas di 60 topico di historia cu ta acesibel na tur esnan cu ta interesa den nos historia. “Ta hopi hende mi ta yuda cu e topiconan aki, algun cu ta tuma curso, pero specialmente nos studiantenan cu nan thesis y spreekbeurt”.
Tambe el a regala Biblioteca y Archivo Nacional mas o menos 13,000 potret di Aruba pa ta accesibel na tur esnan interesa. Dufi ta dedica na e “hobby” aki for di aña 1997 ora cu el a publica su prome buki, pues ya ta 22 aña caba na esaki. “Actualmente mi tin 9 buki publica. Ocho riba historia di Aruba, Lago y di Dos Guera Mundial. Nunca SKOA a acepta uno aunke mi a hiba carta y buki pa nan. Mi a follow up pero nunca mi a haya un contesta. E unico buki di mi cu ta wordo usa na EPB y EPI ta pa motibo cu nan tabata uz’e y mi a regala cada scol 213 buki”.
UN DESEO PA NOS FUTURO GENERACION
“Pa Aruba, mi deseo ta pa nos Arubianonan por tin mas union y positivismo cu a lo largo lo beneficia nos dushi isla c’un ambiente di desaroyo economico y social duradero. Den e tempo moderno aki, nos hubentud tin tur clase di medionan moderno pa siña mucho mas miho cu den nos tempo. Cu hopi dedicacion, y atene nan mes na cosnan positivo, mi ta sigur cu esaki lo contribui na un futuro briyante pa nan y nos isla, sino por wel di lubida di e progreso ambicional cu nos tur ta desea”.
RECONOCEMENTO:
Debi na su trabounan boluntario, el a wordo condecora cu Lid in de Orde van Oranje Nassau na aña 2006 caba. Na aña 2018 como Baluarte di Savaneta y e mesun aña como Honorary Member of Blaauwbaai Foundation Curacao, aparte di e condecoracion actual.
