E fin di siman cu a pasa tabata grandi pa e ciudad di Miami cu pa prome biaha a ‘host’ e careda di Grand Prix-Formula 1. Manera por a pronostica, e evento aki a atrae un cantidad grandi di hendenan pa mira e caredanan aki. Hendenan di tur caminda, incluyendo di Aruba sea a viaha of cu ta biba na Miami of Merca, a probecha pa experencia esaki. E caredanan aki a tuma lugar na e Miami International Autodrome cu ta un circuito temporal traha den e Hard Rock Stadium complex den Miami Gardens.
Ta conoci cu caarchinan pre-venta a ‘sold out’ den e prome ora cu esakinan a sali na venta, apesar di e prijsnan astronomico cu esakinan tabatin. Prijs di caarchinan a varia entre paketenan di 600 dollar te riba 5000 dollar. Apesar di critica riba e prijsnan halto aki, e evento tabata uno completamente bendi.
Alrededor di 240 mil hende a atende e evento aki, probando e desicion di scoge Miami como un ‘great move’ y un ‘turbo charge’ pa haci e caredanan aki mas popular ainda na Merca. Un push pa esaki tambe ta e serie di Formula 1 riba Netflix cu ta hopi popular na Merca y Aruba tambe.
Un grupo di Arubianonan hopi emociona a comparti varios potret riba nan medianan social di e experiencia unico aki, asina serca di cas. Na final e careda aki a finalisa cu e Hulandes Verstappen di Redbull na prome lugar sigui consecutivamente pa Leclerc y Sainz jr. di Ferrari na di 2 y 3 lugar.
E grand Prix 2022 a cuminsa oficialmente na Maart. Segun su schedule, e siguiente careda lo ta 20 di Mei na Catalunya Spaña y lo continua entre paisnan manera Hungaria, Francia e.o. Na Hulanda esaki lo ta dia 3 y 4 di September y lo ta bek na Merca, Austin Texas na October. E conclusion di e 23 round di caredanan Gran Prix mes lo ta dia 20 di November 2022 na Abu Dhabi.
Video: Instagram Anthony Bryson
Video: Instagram Anthony Bryson
Video: Instagram Anthony Bryson
