Kisas lo no pensa mas leu, pero tin un escasez pasando na mundo cu lo por tin un influencia riba e desaroyo di tecnologia grandemente. Mas y mas, menos ta e hobennan cu ta scogiendo pa haci nan estudio den e ramo di STEM (Science, Technology, Engineering, Mathematics). Y esaki a pone un grupo di 7 hoben di Aruba y Corsou, dicidi cu nan ta bay haci di nan parti, pa yuda combati e problema. Asina, K’i ta bo STEM? a nace. Dia 21 y 22 di Juli 2022, e hobennan aki, cu sosten di comercio local, a organisa un 2-day STEM camp na Universidad di Aruba cu tabata un exito. E prome paso di un movecion cu influencia grandi pa futuro generacionnan, cu awor ta marca den historia cu e nombernan Laura Croes, Jillian Oduber, LeAnn Tromp, Maia Rigot, Dianthy Kock, Syari Sinlae y Lau Garcia-Dieguez.
PAKICO STEM TA IMPORTANTE
- E mundo den cual no ta bibando ta cambia constantemente. Educacion di STEM ta cambia sociedad door di ofrece esnan cu ta siña esaki, un forma di pensa nobo y crea abilidadnan cu lo keda balora den cualkier profesion. E ta permiti hobennan pa ta flexibel, busca patron, coneccion y evalua informacion den otro forma. Ademas, STEM ta crea concientisacion y ta comunica esaki na e publico general.
- Trabounan den e ramo di STEM ta creciendo rapidamente compara cu otro ramonan, mundialmente. Esnan gradua den e ramo di STEM tin un entrada mas halto compara cu e careranan non-STEM. Sciencia, Technology, Engineering y Mathemathics ta hunga un rol crucial den e crecemento sostenibel di e economia mundial. Ademas, educacion di STEM ta crea pensadonan critico, e ta aumenta alfabetisacion cientifico y e ta crea un generacion nobo di innovadornan.
- Innovacion ta hiba na producto y procesonan nobo cu ta sigui sostene economia mundial den tur ramo, di technologia pa medicina etc. E tipo di innovacionnan aki ta depende di e conocemento solido den e area di STEM. E ta hopi obvio cu mayoria di trabounan futuro lo rekeri un comprondemento basico di matematica y ciencia y p’esey e motivacion pa mas hobennan mira e estudio di STEM su potencial.
Por lesa mas di STEM nan entrevista den nos edicion digital, tanto den Papiamento como na Ingles.
