Stefan a nace na Alemania y na un edad hoben el a muda cu su mayornan pa Hulanda. Aki cu apenas 12 aña el a tuma su prome trabou den HORECA na unda e tabata laba tayo y pela batata den un restaurant na Groningen. Como hoben el a dicidi di studia Hotel School sigui den e mundo di hospitality. Akinan el a haci tres aña di theoria y un aña di stage. Durante e tempo aki el a traha tambe den horeca na unda e tabatin oportunidad di haci catering na lugarnan bunita y interesante manera binnenhof, Koninklijk Paleis op het Dam.
Na aña 1992 cu apenas 21 aña di edad, Stefan a subi un avion pa prome biaha den su bida rumbo pa Aruba. Akinan tabatin amigonan di su mayornan ta biba y el a bin pa keda serca nan y wak si e por haya un trabou na Aruba. Trahando como waiter, prome na Bistro Le Clochard te ora cu esaki a sera, el a cuminsa c’un carera den Horeca cu awor ta span un periodo di 30 aña. For di akinan el a traha como waiter y manager na diferente establecimento, na ultimo manehando tres restaurant na mesun momento.
Santos Coffee with Soul tambe ta un exito completo. Clientenan ta sinti un rato cu nan “no ta na Aruba” ora nan ta na Santos. E espacio a bira mucho chikito y recientemente Santos a muda pa nan localidad nobo mas grandi. Pronto Dushi Hospitality Group lo ta lansando nan establecimento nobo, M’s Crape Shop, cu lo ta situa den e edificio bieu di Santos. Un aplicacion na unda bo por spaar loyalty points for di cada un di e establecimento tambe ta wordo desaroya awor.
Apesar di tur e exito, bida como un entrepreneur den HORECA nunca no ta stop, tampoco ora bo ta na cas ni tampoco ora bo ta cu vakantie. E ta un trabou cu bo mester tin pasion pe y tambe bo mester sa kico bo ta haciendo. Durante su trayectoria, Stefan a mira exito pero tambe tabatin su momentonan na unda el a perde placa, pero a siña di cada experiencia. Tanto Stefan como tambe su casa ta traha den e negoshi y constantemente nan ta papia di esaki y traha riba e desaroyo di esaki. E ta un parti esencial di nan bida. Como un Hulandes bibando na Aruba semper el a haya importante pa studia y papia Papiamento y participa den nos comunidad. Stefan ta stima Aruba y e ta desea di mira e isla prospera y sigui desaroya sigur den e añanan nos dilanti.
Por lesa mas di Stefan su entrevista den nos edicion digital, tanto den Papiamento como na Ingles.
