E ta un movecion nobo mundialmente yama The tiny-house/small house movement, unda mas y mas hendenan ta cuminsa opta pa biba den espacionan mas chikito, algun hasta no mas grandi cu 40 metro cuadra, cu e mentalidad eco friendly. Tambe ta bin aserca cu e ta posibel pa crea un espacio toch completo c’un tiny house unda por tin tur e cosnan esencial c’un cas mas grandi tin, djis den tamaño diferente kizas y na un prijs mas accessibel, compara c’un cas traha den tamaño tradicional. Un forma di biba mas simpel, unda hopi hende ta mira e importancia na inverti mas den experiencia cu famia na lugar di un cas grandi. Tur e factornan aki a pone Rayson Semeleer y su casa Dalia reevalua nan pensamento ora cu nan tabata kier a bay traha nan cas y a opta pa haci un cambio den nan plan construyendo nan prome tiny house na Aruba.
PAKICO UN TINY HOUSE
Awendia, 4 aña despues cu e pareha a cuminsa traha nan prome Tiny House, awor nan a agrega 2 mas pa yega na 3 construi. E tamañonan no ta surpasa 23 metro cuadra den cual espacio tin tur cos cu lo mester manera e camber, sala, cushina. Mientras Dalia ta percura pa e diseño inicial y di e interior pa e tin un bon synergia y uzo di espacio den forma sabi, Rayson ta encarga, aparte cu e diseño inicial, tambe cu e parti di construccion, electrico y creacion di e mueblenan. E mueblenan aki e ta crea manera e cliente lo desea for di su tayer completamente ekipa. Entre e peticionnan cu nan ta hayando pa traha Tiny Houses, tin hopi studiantenan di Hulanda, cu kier pa traha e casnan aki den cura di casnan di nan mayornan of riba tereno cu nan tin. “Hopi di e studiantenan aki ta biba chikito na Hulanda, pues ta custumbra cu esaki caba y ta gusta.”
Por lesa mas di Yentl su entrevista den nos edicion digital, tanto den Papiamento como na Ingles.
