Desde cu e tin 8 aña, Paula Andrea López Aguilar (38) tabata sa un cos sigur, un dia e lo bira un architect. “E tempo aki caba mi talento a keda descubri pa mi mayornan ora cu nan a ripara cu mi a pinta un bario completo riba e muraya di e cas den nos garashi,” Paula ta conta. Su mama ta corda con e tabata pinta riba cada muraya cu e haya. Semper tabata un cas y un palo di mata banda di dje y asina mi mama a bisa mi tata e tempo aki caba; “e mucha aki ta bay bira un architect.” Paula ta corda tambe cu semper e tabata demostra su talento pa arte di plastic, geometría y dibujo tecnico, talento cu el a bay ta perfecciona y cu a hibe na studia Arquitectura. Paula a studia y gradua na 2005 di e estudio como un architect na Universidad Catholico di Pereira. E tin un master den Diseño Arquitectonico sostenibel y certificacion LEED di e Universidad di Barcelona.
UN MUHER DEN UN MUNDO DOMINA PA HOMBER
E no ta un secreto cu e mundo di construccion ta consisti den su mayoria pa hende homber, pues muhernan manera Paula den e mundo aki ta un muestra cla, cu e ta posibel. “Como hende muher, nos tin tur e capacidad y inteligencia pa gana respet y admiracion den e mundo aki y semper mi a logra esaki cu mi trabou duro y talento tambe. Mi ta kere cu ya awendia, e mundo aki no ta di homber of muher, sino di inteligencia, conocemento y respet.”
FUTURO
“Mi kier sigui lidera, diseña y construi bunita proyectonan pa Aruba, Caribe y Colombia. Mi kier sigui fortalece e workshop di diseño y por duna mas conocemento na e hobennan cu ta drentando den e bunita profesion aki. Den e mundo actual, nos mester por duna bek y si cu mi talento mi por aporta, lo ta un satisfaccion grandi pa mi por hacie.”
Por lesa mas di Paula su entrevista den nos edicion digital, tanto den Papiamento como na Ingles.
