Na mas c’un ocacion, nos a comparti e pasonan di e trayecto di Patrick vd Linde como ciruhano plastico. Den cada entrevista, semper Patrick su deseo tabata di bolbe bek Aruba, un dia, unda el a lanta y tin su famia y su fundeshi, cu ta su mama Irene vd Linde di Laboratorio Familiar. Despues di 17 aña leu for di cas, Patrick vd Linde awor ta bek na Aruba, y e no a bolbe man bashi. E experiencia y conocemento cu el a acumula durante su aña nan afor ta incomparabel y Aruba ta prepara pa ricibi tur e beneficio nan aki.
Un trayecto impreshonante
E trayecto di Patrick pa bira un ciruhano plastico no tabata uno simpel. E a cuminsa su formacion na Merca unda el a haci 2 aña di Pre-Med. E siguiente parada tabata Costa Rica, unda el a dedica 7 aña di su bida studiando medicina. E deseo pa specialisa su mes ainda mas a conduci’e pa Bogota, Colombia. Esaki no tabata un tarea facil, considerando e competencia fuerte pa e poco lugarnan disponibel pa e specialisacion. “Mi a gradua cu e cifra di mas halto y asina mi a bira e prome extranhero cu a drenta na e Universidad de Rosario. Eynan mi a keda 4 aña. Tabata net e epoca di FARC unda como medico, nos tabata bay den campo of traha na hospitalnan temporal trahando cu hendenan den estado di trauma extremo sea pa motibo di explosion nan di bomb of otro agresion nan severo.
Pues nos tabata den un campo militar. No ta solamente su formacion academico a distingui’ Patrick, pero tambe su abilidad pa adapta na situacionnan dificil. Su reputacion a crece, y no a tarda pa Brazil reconoce su talento, invitando’e pa haci un specialisacion adicional den cirugia plastico na Universidad di Sao Paulo, un di e mihornan den mundo. “Nan mes a puntrami pa aplica pa haci un specialisacion adicional den Cirugia Plastico Reconstructiva y Microcirugia di Reconstruccion. Mi ultimo aña na Colombia, mi a siña Portugues y asina mi a logra cualifica pa haci residencia na e Universidad di Sao Paulo (di 6 top na mundo) unda mi a studia y traha pa 5 aña mas.
Por lesa mas di Patrick su entrevista den nos edicion digital, tanto den Papiamento como na Ingles.
