Mientras maternidad pa algun muhernan ta un proceso natural y sin complicacion, ta existi un grupo grandi di muhernan cu ta hiba un lucha emocionalmente hopi halto den nan intento pa sali na estado y logra haya un yiu. Antes e tema aki tabata tabu pero awe, danki na mas y mas muhernan papiando riba e tema aki a haci cu e atencion riba e lucha y proceso aki ta awor mas transparente cu nunca. Natessa Mansur (36) a opta pa duna un entrevista riba e tema aki den un forma habri, relatando su caminda pa logra yega na cumpli cu su deseo di mas grandi; bira mama.
IVF
“Mi a haci e proceso di inseminashon cu ta diferente cu In Vitro Fertilisatie cu si por wordo haci na Aruba mes y ta keda cubri parcialmente pa seguro medico. Despues cu esaki no a duna e resultado, mi a bay Colombia pa haci In Vitro Fertilisatie (IVF), unda nos a yega na etapa cu a logra crea embryos, cual ta duna nos speransa pa un resultado positivo”. Awor Natessa ta cu e proceso di In Vitro pa mas cu 1 aña caba y e cos mas grandi cu el a siña durante e proceso aki ta tene pasenshi, locual e mes ta admiti cu nos ta un di su virtudnan. “Mi a siña tambe pa keda positivo, teniendo na cuenta cu e ta un proceso largo y dificil pero locual mas ta yudami mi den e proceso aki, ta mi FE. Mi a haci cambionan den mi dieta y tambe rutina di ehercicio. Den e caso di PCOS, estudionan ta indica cu baha di peso por stimula fertilidad. Den e proceso aki mi a busca hopi informashon y mi a keda sorprendi di a descubri cu despues di edad di 35 aña e “fertility rate” di un hende muher ta baha drasticamente. Esaki ta informashon cu hopi hende no sa y ta parti di e tabu cu tin riba e topico aki”.
Por lesa mas di Natessa su entrevista den nos edicion digital, tanto den Papiamento como na Ingles.
