“E base principal di cada famia ta amor incondicional y esaki ta algo cu tur ser humano ta capas di brinda.” Asina e politico y Miembro di Parlamento Miguel Mansur (44) ta cuminsa na bisa nos. E ta consciente cu tin hopi persona cu ta skeptico encuanto e capacidad di un persona of pareha homosexual pa ta bon mayor of pa forma un famia sano. E ta splica cu mundo a cambia asina drasticamente desde cu el a caba su universidad na aña 1999, cu e tempo ey no por a ni imagina c’un pareha homosexual lo por a casa mes, corda forma un famia. “Apesar di e prehuicio cu ainda ta existi, estudionan cientifico ta demostra y conclui, cu yiunan di personanan homosexual cu ta dicidi pa cuminsa un famia, ta adapta mihor na bida cu esnan di famianan tradicional. Te awor, ta un minoria di personanan of parehanan homosexual ta didici di bira mayor. Dus esnan cu ta forma un famia realmente kier esey. Pues mi ta kere nan ta specialmente dedica na ser un bon mayor y p’esey e resultadonan ta excepcional. E orientacion sexual di un persona no ta afecta su capacidad pa stima incondicionalmente.”
UN TATA POLITICO
Bida como politico ta añadi un presion mas grandi ainda riba Miguel den su rol como tata. E cambionan a cuminsa cu e mester a muda pa Aruba na momento cu el a dicidi di drenta politica. E mester a splica su yiu mayor cu nan lo muda pa Aruba y e lo bai un scol nobo. E temporada di campaña, specialmente e ultimo lunanan, tabata hopi dificil pa maneha e tempo, pero awor cu el a bira parlamentario, el a haya un bon rutina cu ta traha p’e y su famia.
Durante un siman normal, e ta atende trabou y reunionnan parti mainta, lunch cu e muchanan merdia, despues sigui cu su trabou y reunionnan atardi. Despues atardi laat, un bes mas cu e muchanan y anochi ora nan bai drumi, e ta sigui cu su trabou cu ta principalmente, lesa e cantidad di documentonan cu su trabou ta exigi di dje.
“Durante e simannan cu tin hopi trabou, manera ora di trata presupuesto, mi ta tuma 1 of 2 dia liber despues pa dedica completamente na e muchanan y haci actividadnan cu nan.” Asina e ta crea un balans sano pa nan bida familiar. Mas cu tur cos, e ta contento cu su yiunan por experencia un bida di bai lama tur siman, di hunga cu primonan di nan edad y crece den un ambiente cu hopi actividad familiar y di amigonan. E ta kere cu e rol di mayor ta pa apoya e muchanan door di comparti e experticio y experiencianan cu e mes a adkiri y laga e mucha comberti esakinan den hermentnan pa logra desaroya nan pasion y talentonan. “Mi ta kere cu exito di tur famia ta bin door di brinda amor incondicional y esey ta algo cu ami ta haci diariamente.”
Por lesa mas di Miguel su entrevista den nos edicion digital, tanto den Papiamento como na Ingles.
