Arkitectura ta mas cu solamente un mapa di planificacionnan of edificionan, e ta un demostracion di creatividad, perseverancia, traha y bay tras di un soño. Esaki ta refleha e trayecto remarcabel di Anny Karol y Maggi, 2 arkitecto cu a laga nan pais natal, Venezuela atras, pa crece y briya riba e isla chikito bisiña yama Aruba.
Cu nan pasion comparti pa diseño y excelencia, nan no solamente a supera desafionan, sino tambe awe, ta demostrando ken nan ta cu nan trabou bou di e nomber di nan compania Kairos.
Aruba, e futuro
Anny cu Maggy a yega Aruba na 2018, pa un proyecto cu lo mester a dura 3 pa 6 luna pero poco poco, nan a cuminsa habri nan mesun caminda pa proyectonan nobo. “Ya pa e tempo aki, Aruba a cautiva nos cu su trankilidad y paisahenan unico. Aserca na esaki, e hendenan di Aruba a cuminsa trata nos manera famia. Nos a dicidi cu nos por a haci esaki nos cas y comparti nos experticio cu Aruba.” Sinembargo na 2020, pandemia a yega Aruba tambe y esaki a haci cu Anny y Maggy mester a ahusta hopi di nan plannan. Despues di hopi consideracion, hasta di bolbe Venezuela bek, nan a haya oportunidad pa sigui traha for di cas, diseñando proyectonan den 2D y 3D pa diferente clientenan.
Por lesa mas di nan entrevista den nos edicion digital, tanto den Papiamento como na Ingles.
