Loke COVID 19 ta siñando nos

Cada vez cu nos pasa den un tipo di crisis nacional, nos tin e tendencia pa pensa cu e trauma aki ta cambia nos den un forma profundo y duradero. Tin vez, esaki ta berdad. Si nos bay den historia por mira cu e di dos guera mundial a forsa muhernan pa sali di cas y uni nan mes na forsa laboral cambiando e rol di genero pa semper na mundo den un forma positivo. Den otro momentonan e ta djis un pensamento falso y di momento, un ehempel ta e atake di 9/11 na Merca, unda a pensa cu despues cu mundo tabata testigo di un acto asina cruel cu a mata mas di 3000 persona, esaki lo pone un fin na ironia y maldad. Fout.

Nos lo siña bon lesnan sigur riba con pa nos ta un mihor ciudadano, union social, hygiene, pasenshi, stima nos pais, comparti y yuda otro mas y innova nos forma di traha, educa pero tambe nos lo siña di casonan di abusonan di muhernan intensifica, abuso di muchanan, mas pobresa, panico financiero, falta di preparacion y maneho cortico di gobiernonan y mas.

Durante e crisis di salud aki, nos por wak ken y kico ta e cosnan di mas importante.

Pero nos lo corda e sacrificio, su balor despues cu e virus ya no ta noticia mas? Of nos lo bolbe na e negoshinan manera di custumber, te ora cu e proximo crisis sacudi nos atrobe?

Con nos cada un lo sali di e crisis aki? E meta mester ta pa nos sali como un mihor hende, pasobra realidad ta cu e mundo lo ta diferente. Nos mester ta diferente. Prioridadnan lo bay cambia. Companian kizas lo bay traha mas eficiente, trahadornan lo duna mas balor na nan trabou y cuminsa duna mas na lugar di exigi, entrada di nos economia lo tin cu keda trata cu handschoen di felpa, pues ta nos fundeshi di existencia, gobiernonan lo bay realisa cu gasta pa loco na cosnan innecesario y keda gara cu man bashi durante un crisis no ta un sinonimo na bon gobernashon. Sosten na nos salubridad pa ta prepara pa eventualidad di mas extremo, porfin ta haya su lugar y educacion sin limite pa nos continuacion, porfin lo bira importante den cualkier presupuesto. Esaki ta loke nos por spera y tene confiansa cu lo pasa.

Conclusion; Nos tin cu simplemente sali un mihor hende di esaki, sin importa bo trabou, genero of status social. Nos tin cu forma un mihor comunidad pa cu otro. Mas generoso, mas coperativo, djis mas comprensivo. Nos a keda confronta cu nos realidad, nos ta fragil y vulnerabel como tambe cu cualkier momento, sin spera, tur cos por cambia.

No ta permiti pa nos lubida e dia cu Covid-19 a cambia humanidad completo y mundo mester a sconde y isola su mes, pa un enemigo cruel y invisibel.