Diario personal di Gerlien Croes

6.39pm: “Awor ami ta malo, mi curpa a kibra full full”

9.06pm:  “Mi tin keintura, e no ta baha, mi no kier yama mi mama of tata y Chris no t’aki tampoco paso nos no a keda cla na e cas nobo”

Y esaki ta momento cu mi bida a cambia pa semper. No tabata un diadomingo comun y coriente, paso esaki tabata ya parti di nos bida nobo den cuarentena. Ya algun dia na cas sera, cuidando y cantando cu mi yiunan pa ‘laba man cu habon, hopi bon’ . Tur dia desinfectando y preocupa pa e situacion cu nos a cuminsa biba aden, sin spera un momento cu e lo yega asina serca dimi y mi famia.

Mi a lanta cu hopi dolor di curpa, henter dia mi curpa tabata kibra. Atardi mi a cuminsa empeora y mi tabata sinti cu mi temperatura di curpa tambe a subi. Banda di 9’or anochi mi a bisa mi mihor amiga cu mi garganta ta hopi seco y e ta pika.  Mi a cuminsa pensa cu esaki ta un griep fuerte of kizas mi mester yama call center di DVG toch pa puntra un conseho? Kizas esey ta e mihor idea. Pa 9:30 di anochi mi a yama. Nan lo a bay bespreek mi geval y lo yamami bek.

Den mi mente a cuminsa pasa mil y un cos. Entre otro mi yiunan cu tabata cumi 24/7. Un rato prome mi a bay den camber sinta banda di nan porta lora den mi deken, yen di friu, pasobra nan no por a pega soño pero nan tabata kier mi bin sercanan. Mi no por a subi ariba cama banda di nan, ya di atardi mi a cuminsa splicanan cu mami ta malo y cu ta mihor pa nos no ta serca di otro. Den mi cabes mi tabata imagina…si tin algo? Pero algo manera kico? No lo por ta Covid! Pero Chris tabata malo algun siman prome, e lo tabatin Covid? Pero el a recupera hopi liher. Nos no lo por haña sa mas DVG a bisami. O.k, lagami wardanan yama bek.

10.03pm: Keintura-  38.3

10.21pm– Kizas nan ta druk?  Kizas mi purba yama atrobe? Lagami msg un conocir di mi su conseho: self quarantine, bebe paracetamol, no contacto cu otro hende (locual mi tabata haciendo caba).  Pero awor? Mayan e muchanan lo bay, nan no lo t’ey na cas, pero kico si mi a haci nan malo caba?

10.40pm– Mi a yama DVG bek, promer cu mi a bay drumi. Probablemente e ta un influenza. Wak prome con señora ta sigui. Mi a bay drumi….esaki tabata comienso di un bida nobo, e bida den isolacion.

7.30am: DVG ta yamami. Nan kier a wak con mi a drumi y ta recomendami cuida curpa, ziek uit y kizas yama mi dokter di cas.

8.00am– Mi yiunan a wordo busca y mi a pensa kizas toch ta un idea yama mi dokter di cas paso mi a lanta cu dolor di cabes pero mi no tin echt tosamento. Mi ta bay descansa mi curpa. Dokter lo a keda di yamami bek. Durante dia mi curpa tabata dolor, mi a cuminsa haña tos. Pendiente di dokter su yamada.

5:00pm– Telefon a ring, ta mi dokter. Mi a splike locual mi ta sintiendo, dokter a pensa kizas toch laga nos haci e test pa seguridad cu no ta Covid 19.  Unico cos cu mi tabatin ta tos y mi no tabatin energia. Mi no tabatin keintura mas, mi tabata sinti poco cansa, mi a drumi casi full mainta y merdia.

9.00pm DVG ta yama. Mi a keda informa cu nan ta wardami e siguiente mainta (diamars) pa haci e test pa Covid-19.

Mi curpa tabata kibra pero ya mi no tabata tosando manera e dia promer. Mi a purba wak television, tratamento di presupuesto, pero ya pa merdia mi mester a drumi atrobe.

6.42pm: Dvg yamando. Bontardi señora Croes, nos ta yama pa informa cu señora a test positief…

Mi mundo a parti den mil pida y awor? Tur locual tabata pasando den mi mente caba, a bolbe ripiti.Y awor? Mi yiunan? Con mi ta bay informa mi famia. Lagami cuminsa na esnan cu mester keda informa dibiaha pa por bay den cuarentena y mi tata? E ta pashent di curason, con mi ta bay bise? Y mi mama cu tambe mester bay den cuarentena? OMG y e muchanan? Mester splicanan cu meneer Corona a yega serca Mami y e no mag di yega sercanan y ningun otro hende mas dus nos no por bay wak otro pa basta dia. Nada mas den bida tabata relevante e momento eynan, y asina mi a cuminsa conta e dianan y sintomanan.

Kizas mi tin cu share ariba facebook?

Pero mi ta cansa, mihor mayan.

Kortadem, ya mi no tin tos mi promer bishita di DVG na cas pero mi ta sinti hopi cansa. Smaak, holor, nada no t’ey mas, pero mi ta come si pasobra mi sa cu mi curpa mester di dje. Multivitamina, kiwi, strawberry, appelsina, sopi di ginger. Atardi hasta cuminda of sopi atrobe, unico cos cu mi por pensa ta cu mi mester bira bon y liher. Ami tin cu gana e bataya ‘ki. Tur hende ta cuidami, nan ta trece sopi y lo necesario y laga esakinan den patio. Pero tambe bisiñanan ta preocupa y ta puntra kico ta pasando, dicon DVG tabata aki awe den nan pak?

Atardi DVG a yama y nan kier test Nate mi yiu mayor, pero e no tin sintoma, uhm…pero si e test negatief y e haña sintoma despues e mester bolbe test.  Kizas mihor warda prome wak si e ta cuminsa haya sintoma?

Porta mi tin cu share…mi a graba un video, pero mi ta yora y mi ta demasiado emocional. Porta mi tin cu djis bay live?

Ayeranochi mi no por a drumi bon y awe mi cabes ta draai.  Mi ta sinti swak.  Mi a bay pafor tuma solo bin paden y mi a purba laba mi beker y tayo pero mi a haya un mareo. Lo por ta presion ta abou?  Ainda nada di smaak of holor y awe mi tin malestar di mi bariga, mi tin malo di bariga pero mi no tin diarree. Mi ta bay pidi DVG pa nos warda prome si mi yiu haya sintoma paso e chance ta grandi cu e lo sali negatief awor y nan ta den cuarentena caba.

Mi a bay live ariba facebook I had to share. Mi a comparti cu Aruba cu ami ta 1 di e 17 pashentnan positivo pa Covid-19.

Awe mi a lanta cu dolor na mi pecho, hasta si mi pasa mi man pa pone vicks e ta haci dolor.  E dolor ta pasa hasta pa mi lomba y mi no por hala rosea grandi. Merdia mi ta kere mi presion a baha.  Kizas lo ta como cu mi a come hopi ginger? Not sure, pero despues di lunch cu sopi di ginger merdia mi a bira echt malo, mi  a purba wak series pero mi a cuminsa tembla, friew, zwak, mi a drumi te 5.30pm. Mi tin hopi sed.

Locual ta bon: tur hende rond dimi ta ok, pero mi ta hopi preocupa.  Facebook ta mustrami e mas erg cu ta pasando y cantidad di hende infecta ta keda subi. Hopi hende ta tuma contacto cumi, hopi hende mes. Mi ta purba di contesta tur.

Mi ta sintiendo mescos cu ayera, mi curpa ta mihor, djis cansa. Wak facebook ta hacie mas dificil, hopi negatividad, e ta dunami miedo mihor mi no wak facebook mas. Mi ta purba wak online e timeline di Covid-19 y sintomanan, pero tin asina hopi informacion. Mi no sa cua mi por confia. E sentimento di dolor of incomodidad na mi pecho ainda t’ey.

Ayeranochi mi no por a pega soño, mi tabatin kortadem pero mi a drumi trankil despues, mi ta sinti cansa, awe mi a pensa cu mi ta hayado smaak bek. Hopi hende ta contact mi.  Mi ta aprecia hopi tur e atencion. Mi ta hopi preocupa ainda pa e muchanan y tur esnan rond dimi.  Mi no kier nan bira malo y ainda falta 7 dia mas pa por tin mas trankilidad, pero mi tin speransa cu mi ta recuperando.

Cu musica di meditacion mi ta drumi, kizas mi ansiedad y preocupacion ta haciendo esaki mas dificil.

Mi a tuma 30min di solo awe manera tur dia, mi a sinti mescos cu ayera pero atardi diripiente mi a bira un rato hopi benauwd, mi a traha un te y cende airco despues mi tabata ok back mi a cuminsa cansa mi kier bira bon. Ainda mi tin e feeling incomfortabel den mi pecho.

Awe mi a lanta cu algo nobo.  Un sentimiento manera ora awa bay per ongeluk den bo nanishi, manera mi nanishi ta pika y e ta pasa pa mi garganta. Mi no por a drumi, mi a spierta 1.30 di marduga y despues drumi bek te 5or di mainta.

4.00pm Mi dokter a yamami. E ta pensa cu mas mihor mi keda bira, mas chikito e chance lo ta cu mi por haya un recaida. Esey sigur ta lagami sinti bon.  Smaak y holor ainda ta un problema, verder si mi bolbe bira benauwd y e keda ripiti, mi mester tuma contacto cu call center di biaha. Mi ta cansa, hopi mensahe pa contesta, mi ta sinti mi mester tuma mas tempo pa descansa.

Sintiendo mescos cu ultimo 3 dianan, ainda poco fastioso na pecho pero verder o.k. Awe mi a haya un ‘reality check’. Tabata sinti cu no por ta realidad loke ta pasando cumi y pasando nos tur na mundo. Mi a haci un entrevista mainta cu Magic-Erin.

Mi a haya bishita di DVG. Si mi sigui bon mi lo por test diadomingo of dialuna atrobe. Mi a haci un entrevista (fb live) cu Xclusivo online (y DVG) . Falta 3 dia mas pa mi yega 14 dia y cu mi por ta mas trankil paso esnan rond dimi ta o.k.

11:30 am– Mi a lanta hopi cansa, mi tin dolor na pecho atrobe.  Mi ta kere 2 dia largo tras di lomba mi mester pone mas atencion na mi mes y scucha kico mi curpa mes ta bisami.  Mi ta bay tuma mas tempo pa mi mes, hopi menos telefon, mas descanso. Mi lo cancela e entrevista planea p’awe.

Mi a lanta ta sinti mihor awe, pero mi ta prefera cuida, mesun cos cu ayera. Mi tin miedo di por haya un recaida. Mayan mi ta test. DVG a yamami, mi no ta bay cu high hopes paso mi ta wak cu e ta mustra di tarda pa sali for di nos sistema, pero ken sa, porta mi ta asina leu caba?

4:44 pm– Awe mi a test, pero mi a lanta cu e sentimento di algun dia pasa cu manera awa a bay den bo nanishi y e ta pika bo nanishi y garganta un tiki. Kizas awe mi ta bay ‘live’ pa duna un update pero depende con mi ta sinti mas laat awor ta 4.44pm riba dia 14 di 4^th di april.

Mi yiunan por sali di cuarentena y bay serca mi mama. DVG a caba di informami pero nos ta warda mayan pa haci esey. Mi ta haya nan falta.  Mi ta pura pa bida normalisa, e dianan ta largo…

Awe mi mester a haci un her-test 2. Aunke mi ta positive, mi ta tene na cuenta cu e statisca actual cu ta mustra cu e virus ta dura mas largo pa sali for di e pashent su sistema. Mi ta pendiente di mi resultado di ayera y awe, mi ta spera di tende algo awe ainda.

Mi yiunan a bay serca mi mama, nan ta o.k. y nan ta contento esey ta importante mi ta poco cansa di e dianan con largo tur esaki ta dura. Mi a sintimi o.k. awe, solamente poco dolor den mi pianan pero kizas no tin nada di haber cu e virus.

E ta duro p’ami cu Chris, pero e ta fuerte y e ta yudami keda fuerte. Anochi e tabata niester, nos ta pendiente cu si e ta sinti algo.

Awe mi a lanta bon, merdia mi tabatin un sentimiento raro na mi pecho pero ta mustra algo pasahero. Chris a drumi y lanta bon dus ban spera tur cos ta keda asina. Pendiente di mi resultado henter dia. Mi a purba contact DVG y mi dokter di cas. Mi a logra haya e resultado awemerdia/tardi. Lastimamente tur 2  ta positivo. E lucha ta sigui, 10 dia mas.

Mi a wak mi yiunan awe, nan a pasa den auto y mi por a zwaai for di bentana, mi ta felis di a wak nan.

Mi a duna un update riba facebook c’un post, mi lo keda pending pa un entrevista awe.

Sperando cu awe pasa liher y mi keda bay bon.

Mañan ta un otro dia…