PERFIL
Desde cu e por corda, su cabey tabata krul. Como un yiu di mama y tata cu cabey krul, e genetica dominante aki ta visibel. E krulnan di Lincy Martinez (31) ta cay den categoria di loose curl, cual awor e sa esaki, pasobra prome, manera hopi hende cu cabey krul, e no tabata sa mes di e tipo di krul ni con pa cuida su cabey. El a tuma Lincy mas mas cu 20 aña di su bida, pa por ta awe un experto den cabey krul. Un descubrimento cu a bin, di casualidad.
“El a cuminsa manera djis un hobby 4 aña pasa. “Locual a motiva mi ta e reaccion cu mi a cuminsa haya ora mi mes a cuminsa cuida mi cabey y mi krulnan. Hopi hende tabata puntra mi pa yudansa y eynan mi a bisa cu mi kier yuda mas hende recupera y trata nan cabey krul. Asina mi a cuminsa siña trata tur sorto di cabey, pero door cu na Aruba ningun hende tabata sa con pa hacie, mi mester a bay afo pa mi por siña y bira un estilista specialisa den cabey natural. Mi a cuminsa haci cabey na un cliente su cas, y despues mi a huur un stul na un beauty salon cerca di mi cas. Asina mi a cera conoci cu mas hende na Aruba y pa 2021, mi a dicidi pa finalmente habri mi prome salon specialisa den cabey krul na Aruba,” Lincy ta cuminsa su entrevista ta conta.
KRUL KRUL Y MAS KRUL
Riba internet por haya un chart cu number y letter pa duna guia pa sa mas o menos e textura di bo krulnan. Ami ta mira cu cerca mi, mi ta haya hopi mas tipo di cabey te hasta diferente sorto di krul riba un mesun cabey. P’esey ami ta clasifica e krulnan den 3 sorto; WAVY, CURLY Y AFRO pero esun cu mas mi ta haya ta cabey krul.
BO MESUN RUTINA DIARIO
“Como cu mi ta un persona hopi ocupa, mi ta lanta trempan haci mi cabey. Esey ta tuma mi 1 ora. Despues pa e seca mi ta lag’e air dry henter dia te ora e ta completamente seco si mi ta den pura, mi ta seca esaki cu diffuser y esey ta tumami 1 ora adicional.
Por lesa mas di Lincy su entrevista den nos edicion digital, tanto den Papiamento como na Ingles.
