Ban topa na Kalins?
Ta cuanto no a haci encuentronan agradabel na e restaurant Mexicano cu e propietario semper cla pa atendebo c’un energia unico? Loke hopi no sa ta cu e propietario ey yama Carlos Manuel Lupe Medina (51) su storia ta cuminsa cu su 8 aña, tempo cu, na lugar di hunga pafor y disfruta su niñez, e mester a sali for di cas pa yuda su mama pone pan riba mesa. Awe e mucha homber a crece, ta esposo, tata y propietario di 2 restaurant na Aruba, leu di su pueblo Ticul Yucatan, cu a mira tuma su prome pasonan den bira e persona cu e ta awe.
“Den mi pueblo nan ta yama e hendenan cu yama Carlos, Calin. Ora cu mi a yega Aruba, tur hende a keda yamami Calin. Pa duna e nomber di mi restaurant un toke diferente, mi a dicidi pa cambia e C pa un K y asina e nomber Kalins Mexican, a nace.”
ARUBA – E ISLA DI OPORTUNIDAD
Na 1998, e trabou duro cu Kalin a bin ta haci a mira su prome fruto. El a keda ofreci e oportunidad pa bira hefe di e bar, pero tabatin un detaye; e bar tabata na Aruba cu Carlos and Charlie’s. E mester a bin Aruba pa 3 luna pa habri Carlos and Charlie’s. Sin duda, el a accepta e proposicion y asina el a yega Aruba su so pero cu gana di sigui mustra su abilidadnan trahando duro. “E tabata un ambiente nobo p’ami y cu otro custumbernan. Mi a sintimi mi so riba e isla y a cuminsa haya falta di mi famia pero mi a sigui dilanti semper trahando duro.” Despues di 3 luna, Kalin tabata cla pa bay Mexico bek pero el a dicidi cu e ta bay keda na e isla nobo aki, y traha riba su soño di bira doño di mesun negoshi. Su meta pa logra esaki tabata simpel; traha mas duro ainda y siña mas riba food and beverage.
“Na 2004 mi a conoce mi casa y hunto nos a cuminsa traha duro pa nos soño. Finalmente na 2009, 11 aña despues di a yega Aruba, el a stop di traha cu Señor Frog’s Aruba pa habri su mesun restaurant Kalins Mexican.”
Por lesa mas di Kalin su entrevista den nos edicion digital, tanto den Papiamento como na Ingles.
