E simpel hecho di por mira un muher, cu pa hopi ainda lastimamente ta wordo mira como e sexo debil, para dilanti un audiencia grandi, y trece dilanti su storia di bida, uzando esaki pa empodera otro muhernan, pa para firme pa nan principio y loke nan ta kere den dje, y uza e tool aki pa empodera otronan tambe”. Asina Julio ta describi e forsa di e pasion latente pa mundo di beyesa cu e tin desde su niñez. Un pasion latente ya pa 26 aña caba preparando varios reinanan, den diferente categoria, y c’un lista largo di logronan. E mas ultimo ta Miss Universe Aruba Thessaly Zimmerman, kende despues di 25 aña ta logra un posicion clave den top 10 finalista di Miss Universe y a keda prepara pa Julio Andrews.
Xclusivo Magazine a combersa cu Julio y den un forma UNCUT, e ta duna su pensamento riba e pasado, e presente y kico e futuro mester bira pa e mundo di beyesa na Aruba.
Hopi biaha tin critica di parti di un publico cu ta pensa cu no tin un aspecto intelectual of no ta wordo poni suficiente enfasis riba esaki durante certamen di beyesa. Kico ta bo opinion di esaki y con nos missnan akinan ta prepara nan mes intelectualmente?
Manera den hopi cos, 99% di e publico cu ta opina, no tin e minimo idea di kico ta come y bebe di un certamen di beyesa, mucho menos ora ta trata di un internacional. Awendia, mas y mas a ser demostra c’un certamen no ta trata mas di un curpa y un cara bunita, pero mas bien di un persona capacita, prepara, c’un conocemento intelectual amplio riba diferente topiconan, y cu por transmiti esaki na un audiencia, manteniendo e atencion di esnan cu ta scuchando.
